Олоҥхолоох буолан орто дойдуну ойуулаатахпыт

Бу күннэргэ Томторго Олоҥхо декадатын чэрчитинэн үс хайысханан оҕолорго улуустааҕы күөн күрэс ыытылынна.

Бу туһунан эрэдээксийэҕэ Томтордооҕу Оҕо ускуустубатын оскуолатын дириэктэрэ Галина Петрова иһитиннэрдэ. Куонкурус СӨ Олоҥхо Ассоциациятын үбүнэн өйөбүлүнэн, Томтордооҕу Оҕо ускуустубатын оскуолатын тэрийиитинэн ыытылынна. Манна Өймөкөөн улууһун 8 оскуолатыттан уопсайа 221 үөрэнээччи кытынна. Куонкурус олоҥхо тиэмэтигэр дакылааты көмүскээһин, олоҥхону толоруу уонна уруһуй хайысхаларынан ыытылынна.

Улуустааҕы олоҥхо күөн күрэһигэр тэрийээччилэр кыттааччыны үс категориянан араардылар: алын, орто уонна улахан сүһүөх кылаас үөрэнээччилэрэ. Оҕо олоҥхону хайдах ылынарын, өйдүүрүн чаҕылхайдык арыйар түһүмэҕинэн дакылаат көмүскээһинэ буолла.

Томтор орто оскуолатын учуутала Люция Егорова тэрээһин туһунан санаатын маннык үллэһиннэ:

Бу олоҥхоһут суох сиригэр салайааччылар оҕону олус даҕаны табан үөрэппиттэр, олоҥхону толоруулара — олох үрдүк таһымҥа, — диэн бэлиэтиир. — Өймөкөөнтөн Сардаана Уйгун оҕолоро олоҥхону толоруулара оһуобай. Аҥардас “Айылгы” бөлөх солист уолун киһи эрэ истэ олоруох олоҥхоһута эбит. Дьарыгын бырахпатаҕына, өрөспүүбүлүкэ олоҥхоһуттарын кытта тэҥнэһэр оҕо буолбут. Куолаһа эриэккэһин! Сордоҥноохтор кылыһахтара эчи күүһүн, кыттааччылара да элбэх. Төрүттэр аҕыйахпыт, “бытархайбыт” диэбэттэр, эмиэ талааннаах да кырачааннар. Томтордооҕу Оҕо ускуустубатын оскуолата элбэх оҕону үрдүк таһымнаахтык бэлэмнээбит, бу — улахан сыраны эрэйэр үлэ. Үчүгэй, Томтор оскуолалара кыахпыт баарынан оҕолору бэлэмнээн кытынныбыт. Любовь Березкина салайыытынан олоҥхобут оннооҕор английскайдыы тылынан толорулунна. Онон олох үрдүк таһымнаах тэрээһин буолан ааста».

Улуустааҕы Олоҥхо куонкуруһун оройуоннааҕы Култуура уонна туризм сайдыытын управлениетын начаалынньыга Аксинья Сивцева,  Томтордооҕу Оҕо Ускуустубатын оскуолатын дириэктэрэ Галина Петрова, Томтордооҕу Култуура киинин уус-уран салайааччыта Евдокия Готовцева, Томтордооҕу модельнай бибилэтиэкэ сэбиэдиссэйэ Амгира Спиридонова, СӨ Култууратын туйгуна Ньургустаана Дьячкова дьүүллээтилэр.

Оҕолор улуустааҕы куонкуруска бары сатабылларын, талааннарын көрдөрдүлэр. Күөн күрэс үһүс хайысхатыгар – уруһуйга уопсайа 177 үлэ киирбитин дьүүллүүр сүбэ эмиэ сөптөөхтүк сыаналаата.

Бу суолталаах тэрээһиҥҥэ кыттыбыт 221 оҕону 45 салайааччы бэлэмнээтэ. Онон киэҥ далааһыннаах куонкуруска тыа сирин дьоно маассабайдык кыттыбытын бэлиэтиэххэ наадалаах. Манна кыттааччылар эрэ буолбакка, кинилэр төрөппүттэрэ, чугас дьоно, доҕотторо күүс-көмө, өйөбүл буолбуттара саарбахтаммат.

Олоҥхо улуустааҕы күөн күрэһигэр күүстээхтик бэлэмнэнэн салайааччылар киһи-аймах тылынан баайын-дуолун аан дойдутааҕы тиһигэр ЮНЕСКО-ҕа киирбит саха уус-уран айымньытын үүнэр көлүөнэ ыччакка сатаан тиэрдибиттэрин, хас эмэ сыллаах сыралаах үлэлэрэ халтайга хаалбатаҕын көрдөрөр.

Онуоха эбии улууска быйыл сайын ыытыллыбыт өрөспүүбүлүкэтээҕи “Айыы санаа айана” Олоҥхо Ыһыаҕар быһаччы кыттыыны ылбыт буолан, үгүс оҕо олоҥхону сүрэҕинэн, өйүнэн-санаатынан ылынара көһүннэ. Норуотун үгэскэ кубулуйбут култууратын илдьэ сылдьар ыччат кэнэҕэскитин дойдутун дьиҥнээх патриота буола үүнүө турдаҕа.

Бу туһунан сиһилии “Хотугу сардаҥа” хаһыакка ааҕаарыҥ.

Любовь Кривошапкина

Читайте дальше