Саха сиригэр баһаарынай сезон ыам ыйын 6 күнүттэн аһыллыбыта. Ойуур баһаардарыттан сэрэхтээх буолуу кэмэ биллэриллиэҕиттэн, «Якутлесресурс» тэрилтэ үлэтин саамай үгэнэ. Бүгүҥҥү күҥҥэ Өймөкөөн улууһун тыатын сиригэр туох-ханнык үлэ тэриллэрин туһунан «Якутлесресурс» Индигирдээҕи филиалыгар ойуур харыстабылын инженерын Гаврил БЕРЕЗКИНЫ кэпсииригэр көрдөстүбүт.
ГАВРИЛ туһунан кылгастык билиһиннэрдэххэ, кини улууспут Төрүт нэһилиэгиттэн төрүттээх. Томтордооҕу орто оскуола кэнниттэн 2007 с. Суоттутааҕы 19 №-дээх профессиональнай лицейгэ үөрэммитэ. Айылҕа харыстабылын эйгэтигэр үлэлиибитэ номнуо 15 сыла буолла. Томторго олорор.
— Биһиги үлэбит сүрүннээн ойуур баһаарын бохсорго уонна нэһилиэнньэ ортотугар сэрэтэр, быһаарар-өйдөтөр үлэни тэрийэргэ туһуланар, — диир Гаврил.
Ойуур баһаарын кэтээн көрөр үлэ 3 көрүҥэ баар. Айылҕа баһаардарын сэрэтэргэ рейдэлэр (патрулирование) ыытыллаллар. Ону тэҥэ технология сайдан, спутник көрүүтэ кэлиҥҥи кэмҥэ биллэрдик тубуста. Авиалесоохрана сөмөлүөтэ эмиэ күн аайы көтөр.
Федеральнай сокуон олоххо киириэҕиттэн ыла сири өртөөһүн бобуллар. Кураан оту өртүүр, аһаҕас уоту туттар бобуулаах. Уот турар түгэнигэр, адьас кыра эрдэҕинэ тыллыыр ордук, оччоҕуна айылҕа харыстабылын үлэһиттэрэ тута умуруорар кыахтаахтар. Лаҥхалаах сирдэр сыл ахсын элбээн иһэллэр. Онно тиийэн кытта биһиги бэрэбиэркэлиибит, рейдэлэри ыытабыт.
Баһаар сезона саҕаланан, билиҥҥи туругунан ойуурга балаһыанньа сэрэхтээх. Сэрэтии үлэлэрэ ыытылларын үрдүнэн, дьон син биир сири өртүүллэр. Билиҥҥи туругунан муниципалитет сиригэр икки баһаар уота умайар. Баһаарга балаһыанньа күн аайы түргэнник уларыйа тутар.
ОЙУУРГА уот турар кутталлаах кэмэ үүммүтүнэн, искусственнай ардаҕы ыҥырар самолет күн ахсын араас улуустарга көтөр. Биһигини эмиэ таарыйан ааһар.
Быйыл ойуур баһаардарыгар дьоһуннаахтык бэлэмнэнэбит. Тэрилтэбит сылын аайы саҥа тиэхиньикэнэн хааччыллар буолан, үлэлиир усулуобуйа тупсан иһэр.
Былырыын өрөспүүбүлүкэҕэ уот күүскэ туран, Өймөкөөн улууһугар 20-тэн тахса тыа баһаарын умуруорубуппут. Айылҕа баһаарын түмүгэр үөскүүр ыксаллаах быһыыны-майгыны сэрэтиигэ уонна туоратыыга бэлэмнээх буолууну хааччыйыы — биһиги эбээһинэспит.
Дьон уоту сэрэҕэ суох туттуута, айылҕаҕа, тыаҕа сынньана, кустуу сылдьан уоту дьалаҕайдык туттуута баһаар төрүөтүнэн буолар.
— Өймөкөөн улууһун олохтоохторо, баһаартан сэрэхтээх буолуу кэмэ саҕаламмытынан уонна куйаас, кураан халлаан турарынан сибээстээн, ойуурга сынньалаҥҥа тахсартан, аһаҕас уоту туттартан туттунун, — диэн ыҥырда Гаврил Афанасьевич дьону-сэргэни, биир дойдулаахтарын.
Санатар буоллахха, Саха сиригэр тыаҕа баһаарынай куттал үрдүкү 4 кылааһа «Дьокуускай куорат» уокуруктарыгар Мэҥэ Хаҥалас, Хаҥалас, Горнай, Чурапчы, Уус-Маайа, Алдан, Сунтаар, Ньурба, Үөһээ Бүлүү, Эдьигээн, Верхоянскай, Томпо, Орто Халыма, Муома, Кэбээйи, Өймөкөөн оройуоннарыгар олохтоммута.
Евдокия ЕГОРОВА