Ойор-тэбэр оҕо саас

Соторутааҕыта «Ойор-тэбэр оҕо сааһым» диэн бырааһынньыктааҕы тэрээһин Томтор нэһилиэгэр оскуола былаһааккатыгар тэрилиннэ. Бу күн араас сэргэх күрэхтэһиилэр буоллулар, онно оҕолор бары олус көхтөөхтүк кытыннылар.

Быйылгы сылбыт дьиэ кэргэн уонна оҕо саас сылынан биллэриллибитэ биһигини барыбытын үөрдэр.

Бу бырааһынньыкка уһуйаан хас биирдии бөлөҕүттэн төрөппүттэр кытыннылар. Кинилэр сахалыы таҥнан-симэнэн кэлбиттэрин көрөн киһи эрэ үөрэр. Иитиллээччилэрбит кыралыын-улаханныын бары үөрэн-көтөн туран ыалдьыттары, уһуйаан бэтэрээн үлэһиттэрин ылбаҕай ырыанан, элэккэй үҥкүүнэн эҕэрдэлээтилэр.

Быйылгы тэрээһиммит урукку сыллартан уратыта диэн дьиэ кэргэн сылыгар тирэҕирэн, төрөппүттэр оҕолорун кытта бэйэлэрин талааннарынан, эҕэрдэ нүөмэрдэринэн бырааһынньыкпытын киэргэттилэр.

Кыра бөлөх уһуйааччылара уонна көмөлөһөөччүлэрэ дьэрэкээн өҥнөөх фотозона оҥорон, төрөппүттэр оҕолорун уонна дьиэ кэргэннэрин кытта онно астына хаартыскаҕа түстүлэр.

Биһиги уһуйааммыт төрөппүттэрэ бириис, наҕараада иһин буолбакка, оҕолорун тустарыгар баҕа өттүнэн кыттыбыттара олус хайҕаллаах.

Аан дойду оҕо көмүскэлин күнүн чэрчитинэн ыытыллыбыт үөрүүлээх сайыҥҥы тэрээһиммитигэр кыттыбыт бары оҕолорбутугар, төрөппүттэрбитигэр истиҥник махтанабыт. Олус астына-дуоһуйа ыллаан-туойан, бэһиэлэйдик оонньоон-көрүлээн, сэргэхсийэн барбыккыт буолуо диэн эрэнэбит. Өрүү да бу курдук бука бары көхтөөх, түмсүүлээх буолуоҕуҥ!

Валентина СИВЦЕВА,

Томтордооҕу «Кэскил» уһуйаан сэбиэдиссэйэ

Читайте дальше