Сокуоннай саастарын ситэ илик оҕолор бырааптарын көмүскүүр өрөспүүбүлүкэтээҕи хамыыһыйа быйыл оҕолорго сыһыаннаах быһылааннары ырытан баран, оҕо доруобуйата эмсэҕэлээһинин түбэлтэтэ элбээн иһэрин бэлиэтиир.
СӨ Доруобуйа харыстабылын министиэристибэтин иһитиннэриитинэн, 2024 сыл бастакы аҥарыгар Өймөкөөн улууһугар 47 оҕо араас көрүҥнээх (21 – уулуссаҕа, 19 – дьиэ кэргэҥҥэ, 4 – оскуолаҕа, 3 – итиигэ буһуу) эчэйиини ылбыт.
Оттон уу эбийиэктэригэр оҕолор бобуллар сирдэргэ эбэтэр улахан дьон кэтээн көрбөккө ууга сөтүөлүүллэрэ өрөспүүбүлүкэ үрдүнэн саамай элбэхтик көстөр түбэлтэ. Оҕолор дьиэ бассейннарыгар киирэн баран, бэйэлэрэ тахсар кыахтара суох хаалар түбэлтэлэрэ үгүс.
Быйыл ууга 8 оҕо өлүүлээх 7 быһылаан таҕыста: (22.06.2024 с.: Хаҥалас улууһугар – 15 саастаах оҕо; 07.09.2024 с.: Дьокуускай к. — 11 саастаах оҕо; 18.07.2024 г.: Ньурба улууһугар – 14 уонна 15 саастаах оҕолор; 05.08.2024 с.: Өймөкөөн улууһугар — 6 саастаах оҕо; 1 оҕо дьиэ бассейыныгар тимирбит (25.06.2024 с.): Таатта улууһа — 1 саастаах оҕо).
Өймөкөөн оройуонугар 2024 сыл атырдьах ыйын 5 күнүгэр ууга сүппүт 6 саастаах оҕону көрдөөһүн салҕанар. Кинини көрдүүргэ дьон тиийбэт. Оройуон дьаһалтата көмөлөһүөн баҕалаахтар билсэллэригэр көрдөһөр. Көрдүүр бөлөххө тиэхиньикэнэн уонна уматыгынан көмөлөһүөхтэрэ.
Уу эбийиэктэригэр дьон, ол иһигэр оҕолор эмсэҕэлээбэттэрин уонна өлүүлэрин сэрэтэр сыалтан, “Уу – куттала суох территория”, “Оҕо саас куттала суох буолуута”, “Ууга үөрэниҥ” аахсыйалар чэрчилэринэн, өрөспүүбүлүкэ үрдүнэн биэдэмистибэлэр икки ардыларыгар бииргэ үлэлээһин иитинэн холбоһуктаах рейдэлэр ыытыллаллар. Сокуоннай саастарын ситэ илик оҕолор төрөппүттэрэ эбэтэр атын сокуоннай бэрэстэбиитэллэрэ бэйэлэрин эппиэтинэстэрин толорботохторун уонна сокуоннай саастарын туола илик оҕолору үөрэтиигэ кыттыбатахтарын иһин РФ Административнай быраабы кэһиилэр кодекстарын 5.35 ыстатыйатынан миэрэҕэ тардыллыахтара. Оҕо улахан киһи көрүүтэ-истиитэ суох уу эбийиэктэригэр сылдьыбатын туһугар түргэн дьаһаллар ылыллыахтаахтар (полицияҕа, төрөппүттэргэ биллэрии уо.д.а.). Нэһилиэнньэҕэ оҕолору кэтээн көрөр уонна улахан дьоно суох уу эбийиэктэригэр киирбэттэрин туһунан иһитиннэрэр үлэ күүһүрдэ.
Төрөппүттэр оҕолорун өрүс, күөл аттыгар сылдьалларын хонтуруоллуохтарын наада. Кыра оҕолор электрическэй тэриллэри, гаас оһохтору уонна испиискэни кытта алтыһыа суохтаахтар, кинилэри дьиэлэригэр соҕотохтуу хаалларымаҥ. Оҕоҕо сэрэхтээх сыһыан күннэтэ наадатын өйдөөҥ!
“Өймөкөөн улууһа” МТ дьаһалтата