Бу күннэргэ улуус баһылыгын э. т. Александр Иванов нэһилиэктэр баһылыктарын кытта куйаар ситиминэн сүбэ-мунньаҕы ыытта.
Бэбиэскэҕэ олох-дьаһах сүрүн боппуруостарын ырыттылар. Ол курдук, сорох муниципальнай тэриллиилэргэ нэһилиэк Социальнай-экэнэмиичэскэй сайдыы стратегиятын болдьоҕо бүтэн эрэринэн 2032 сылга диэри докумуону саҥардар сорук турда. Бу туһунан улуус баһылыгын э.т. Александр Иванов баһылыктарга иһитиннэрдэ:
— Балаҕан ыйын ортотугар нэһилиэктэринэн сылдьан, Социальнай-экэнэмиичэскэй сайдыы стратегиятын оҥорууга сүбэлиэхпит. Онуоха диэри баһылыктар барыллааһын докумуону, ол эбэтэр нэһилиэк кэскиллээх сайдыытын торумун оҥоруохтарын наада. Ол кэнниттэн нэһилиэнньэни кытта «Публичнай истиилэр» буолуохтаахтар. Докумуон хайаан да олохтоохтор дьүүллэһиилэрин ааһыахтаах. 3 сыллаах бүддьүөтү ылыныы ирдэбилинэн бастаан муниципальнай таһымҥа Социальнай-экэнэмиичэскэй сайдыы стратегиятын истии буолуохтаах, — диэтэ Александр Иванов.
Иккис суолталаах боппуруоһунан улуус салайааччыта: «Быйылгы сыл саҥатыгар кэлэн барбыт Ситэриилээх былаас отчуотун Боротокуолугар киирбит боппуруостары кытта хайдах-туох үлэни ыыта сылдьаргытын отчуоттаан улуустааҕы дьаһалтаҕа тиксэриҥ», диэн эттэ баһылык э.т. улуус салайааччыта.
Кырдьык, былаас отчуотун кэннэ аҕыс ый ааста. Онон тустаах түмүгү оҥоруохха сөп. Олохтоох нэһилиэнньэ туох үлэ барарын билиэн баҕарара чахчы.
Үһүс сүрүн боппуруос — быйылгы оттук сезона балаҕан ыйын 1-кы күнүттэн саҕаланар. «Бу күннэргэ «Теплоэнергосервис» АУо Өймөкөөн улууһунааҕы филиалын үлэһиттэрин хонтуруоллааҥ, хочуолунайдары болҕомтоҕо ылыҥ. Өскө бэлэм бытаан эбэтэр олох мөлтөх буоллаҕына, эрдэттэн улуустааҕы прокуратураҕа суругунан биллэриҥ», — диэн эттэ улуус баһылыгын э.т. Александр Иванов.
Бу туһунан сиһилии “Хотугу сардаҥа” хаһыакка ааҕаарыҥ.
Өймөкөөн улууһун пресс-сулууспата