Нам улууһун Хатырык нэһилиэгэр уһулуччулаах государственнай уонна политическай деятель М.К. Аммосов кубогар Саха сиринээҕи культурнай-спортивнай ыччат слета үөрүүлээх арыллыыта буолла. Манна өрөспүүбүлүкэ 4 улууһуттан 200-чэ төрөөбүт дойдуларыгар таһаарыылаахтык үлэлии, айа-тута, үөрэнэ сылдьар көхтөөх эдэр дьон муһунна.
Слет Россияҕа педагог уонна наставник, Саха сиригэр Үлэ, Нам улууһугар Биир санааланыы уонна сомоҕолоһуу сылларыгар ананар.
Слет үөрүүлээх арыллыытыгар Саха Өрөспүүбүлүкэтин бырабыытылыстыбатын бэрэссэдээтэлин солбуйааччы Сергей Местников, СӨ тыатын хаһаайыстыбатын миниистирэ Александр Атласов, «Нам улууһа» МТ баһылыга Юрий Слепцов, СӨ ыччат дьыалатыгар уонна дьиэ кэргэн бэлиитикэтигэр миниистирин солбуйааччы Надежда Мохначевская ыалдьыттаатылар, Максим Аммосов өйдөбүнньүгэр тыыннаах сибэкки ууран сүгүрүйдүлэр, слет кыттааччыларын эҕэрдэлээтилэр.
Слет сүрүн сыала-соруга эдэр дьон чөл олоҕу тутуһан, өй-санаа, сиэр-майгы, эт-хаан өттүнэн чэгиэн-чэбдик, төрөөбүт дойдуга бэриниилээх, туһалаах буола сайдалларыгар уонна киэн туттар биир дойдулаахпыт Максим Аммосов уонна кини соратниктара Платон Ойуунускай, Исидор Барахов, Степан Аржаков, Степан Васильев сырдык ааттарын үйэтитии буолар.
Максим Аммосов – Чаҕылхай Махсыым кубогар Саха сиринээҕи культурнай-спортивнай ыччат слета бастакытын ыытыллар уонна сылтан сыл кыттааччылар ахсааннара элбээн, таһыма үрдээн иһиэҕэ диэн эрэллээхпит.
Тэрийээччилэр СӨ ыччат дьыалатыгар уонна дьиэ кэргэн бэлиитикэтигэр министиэристибэтэ уонна «Нам улууһа» МТ дьиэ кэргэн уонна ыччат управлениета, «Хатырык нэһилиэгэ» МТ тэрээһини үрдүк таһаарыылаахтык cаҕалаатылар. «Диалог на равных с молодежью» СӨ уонна Нам улууһун салайааччылара ыччаты кытта көрсөн кэпсэтиилэрэ, спортивнай күрэхтэһиилэр, Ил Түмэн иһинэн үлэлиир Ыччат парламенын бэрэссэдээтэлэ Антон Васильевы, Саха сириттэн Москва куоракка саха атынан сиэллэрэн тиийбит Дугуйдан Винокуровы кытта көрсүһүүлэр, Федеральнай ыччат агентствотын эксперэ Дмитрий Куприянов бырайыактары суруйууга, граннарга кыттыыга үөрэтии семинара ыытыллыахтара. Киэһэ Гоша Васильев — Джида кыттыылаах ыччат уоттаах-күөстээх дискотеката буолуоҕа.
«Нам улууһа» МТ пресс-сулууспата