18-с «Азия оҕолоро» норуоттар икки ардыларынааҕы оонньуулар чэрчилэринэн быйыл уопсайа 1900 волонтер кыттыыны ыла сылдьар. Тэрээһин саҕана үгүс сүүмэри ааһан хапсыбыт волонтердар Дьокуускайга тиийэн, үөрүүлэрэ үгүс. Кинилэр ортолоругар биьиги улууспутуттан эмиэ бааллара кэрэхсэбиллээх.
«Азия оҕолоро» оонньууларын волонтёрдар ыстааптарын салайааччы Айыллаан Винокуров этэринэн, волонтердар Саха сириттэн эрэ буолбакка дойду эрэгийиэннэриттэн уонна тас дойдулартан кэлбиттэр. Олор истэригэр атын сылларга үлэлээбит волонтердар эмиэ бааллар.
Арассыыйа араас муннуктарыттан уонна атын дойдулартан кэлбит волонтердар киэҥ хабааннаах спортивнай дьаһал тэрийээччилэригэр күүс-көмө, тирэх буолаллар.
Эдэр волонтер, биһиги биир дойдулаахпыт Екатерина БАЛАЕВА — Томтор нэһилиэгиттэн төрүттээх, Дьокуускай куорат 5 №-дээх орто оскуолатын 10-с кылааһын үөрэнээччитэ. Кини бу курдук кэпсээтэ:
— Мин 2022 сыллаахха «Азия оҕолоро» норуоттар икки ардыларынааҕы оонньууларга кыттыбытым. Ол кэнниттэн тренерым Ульяна Юрьевна Винокурова салайыытынан уонна көмөтүнэн бу киэҥ хабааннаах күрэхтэһии эйгэтигэр хаттаан киирэр туһуттан сыал-сорук туруорунан үлэлэспитим.
Ити түмүгэр мин билигин «Азия оҕолорун» волонтера буолан, спортивнай хайысханан үлэлии сылдьабын. Оонньуулар үөрүүлээх аһыллыыларыгар уонна сабыллыыларыгар кыттыахтаахпын. Күрэхтэһиигэ кэлбит кыттааччылары көрсөбүн, ыалдьыттары арыаллыыбын уонна кинилэргэ көмөлөһөбүн. Ону таһынан чэпчэки атлетикаҕа күрэхтэһии кэмигэр көмөлөһөөччүнэн сылдьарга сорудахтаахпын.
Араас сиртэн кэлбит спортсменнарга уонна Сахабыт сирин спортсменнарыгар ситиһиилэри баҕарабын, ким дьарыктаммыт, ким күүскэ бэлэмнэммит — ол ситиһиилээх буоллун. Аан дойду араас муннуктарыттан Саха сиригэр мустубут эдэр спортсменнарга туохтан да чаҕыйбакка-куттаммакка, долгуйбакка күрэхтэһэллэригэр баҕарабын. Бары туруоруммут сыалларын ситистиннэр. Ким күүстээх – ол кыайдын!
Редакция
Бу туһунан сиһилии «Хотугу сардаҥа» хаһыакка ааҕын