Арассыыйаҕа биллэриллибит Педагог уонна Уһуйааччы сылын иитинэн «Мин бастакы учууталым» аахсыйа бүгүҥҥү ыалдьытын билиһиннэрэбит.
Борис Скрыбыкин, «Комтехсервис» тэрилтэ салайааччыта, Уус-Ньара:
Бастакы учуутал киһи олоҕор улахан оруолу ылар биир сүрүн киһибит буолар.
Мин маҥнайгы кылааска 1996 с. Сордоҥноох орто оскуолатыгар үөрэнэ киирбитим. Бастакы учууталым Ольга Петровна Винокурова буолар. Кини олус болҕомтолоох, сэмэй учуутал.
Ольга Петровна биһигини ааҕарга, суруйарга уонна суоттуурга бэрт кыһамньылаахтык үөрэппиттэ. Хас биирдии оҕо интэриэһин тардан, кими да туора туппакка ис дууһатын ууран туран барыбытыгар билиититтэн бэрсибитэ. Ольга Петровна сүрдээх ирдэбиллээх учуутал буолан, эппиэтинэстээх буоларга үөрэммиппит. Учууталбытын бары убаастыырбыт, үөрэтэр уруоктарын долгуйа күүтэрбит.
Биһиги олус иллээх уонна эйэлээх этибит, куруутун бэйэ-бэйэбитигэр көмөлөсүһэрбит, убаастабыллаахтык сыһыаннаһарбыт. Хас биирдии үөрэнээччи кылаас олоҕор кыһаллааччы, араас тэрээһиннэргэ бэйэтин кылаатын киллэрэ сатааччы.
Ольга Петровна хас биирдии оҕо майгытын табан, иилээн-саҕалаан салайан, ийэлии такайан, олоххо туохтан да чаҕыйбакка иннибит диэки дьулуурдаахтык туруулаһан, туруоруммут сыалбытын ситиһэргэ үөрэппитэ. Олус элэккэй, эйэҕэс, ийэ тэҥэ киһибитин олус таптыырбыт, холобур оҥосторбут.
О.П. Винокурова элбэх оҕону билиигэ-үөрэххэ кынаттаабыта. Билигин кини үөрэппит оҕолоро олоххо бэйэлэрин миэстэлэрин булан, дойду араас муннуктарыгар таһаарыылаахтык үлэлии-хамсыы сылдьаллар.
Биһиги корр.