Махтанабын барыны баар гынан тыынныыр Үрдүкү Күүстэргэ. Махтанабын өрүү айыым быатын-ситимин тиһэн тыын уган айымньылаах санааны салайар Айыыһыппар!
Махтанабын бу сиргэ киһи буолан кэлэрбэр аартыкпын арыйбыт түҥ былыргыттан төрүкү төрдүлээх өбүгэлэрбэр. Махтанабын күн сырдыгын көрдөрбүт айбыт аҕабар, күн күбэй ийэбэр. Махтанабын тулабар баар чугас дьоммор. Махтанабын саҕыллар санааларбар төрүөт буолан имнэнэн ааһар араас үтүө даҕаны, мөкү даҕаны түгэннэргэ, ураты дьоннорго. Махтанабын кэрэни арыйан сипсийэн сэһэргиир айылҕам сиккиэригэр!
Махтал — Айыылар аһылыктара диэн мээнэҕэ этиллибэт. Махталга итэҕэл күүһүн күлүүһэ баар…
Киһи бу сиргэ кэлбит төрүөтүн өрүү махталынан ылынан, сайа-дьайа сылдьара үтүөнү эрэ төлкөлүүр, кэрэни эрэ кэһиилиир.
Ис сүрэхтэн иэйэн махтаныы олус элбэҕи арыйар, сааһылыыр, тупсарар, чиҥэтэр күүстээх. Тоҕо диэтэр махтал нөҥүө киһи тус бэйэтин уонна махтаммыт киһитин сүрэ күүһүрэр. Кинилэр олоххо тыыннара чиҥиир, өйдөрө ырааһырар, көхсүлэрэ кэҥиир. Иннигэр кэрэни кэккэлэтэр аартык арыллар.
Махталынан сылдьар киһи эйгэтэ сырдык уонна ыраас. Санаата сымнаҕас эрээри чиҥник сааһыланар. Ол иһин Айыыһытын уонна Өбүгэтин харысхала олус күүстээх буолар.
Өрүү баарга, барыга махталлаах буолуоҕуҥ!
Семен Сивцев – Өймөкөөн Сэмэнэ