Муус устар 25 күнүттэн Саха сирин киинэ тыйаатырдарыгар «Кыталыктаах кырдалым» («Там, где танцуют стерхи») диэн саҥа сахалыы киинэ таҕыста.
Бу киинэ Чукотка киин куоратыгар Анадырьга ыытыллыбыт Арктикатааҕы «Золотой ворон» диэн норуоттар икки ардыларынааҕы VIII бэстибээлгэ Гран-При наҕарааданы ылары ситистэ. Өссө сүрүн оруолу толорбут эдэркээн артыыс Миша Слепцов «Эр киһи бастыҥ оруола» диэн анал аатынан бэлиэтэннэ. Киинэ режиссера, Уус-Алдан Чараҥыттан төрүттээх Михаил Лукачевскай буолар. Кини оҕо сылдьан суруйааччы, учуонай уонна фотограф Иван Дьячковскай-Кыталык Уйбаан кэпсээннэрин сөбүлээн ааҕарын туһунан кэпсиир. Ордук «Кустугу ситтэрбиэн» диэн айымньытын олус сөбүлээбит. Киинэ 2021 сыллаахха уһуллубут, кэлин кыталык үҥкүүтүн компьютернай графиката оҥоһуллубут. — Сахалар былыргыттан кыталык үҥкүүтүн көрбүт киһи дьоллоох буолар дииллэрэ. Киинэ нөҥүө кыталык үҥкүүтүн дьоҥҥо көрдөрөн, кинилэр санааларын сырдатар, дьолу уунар киинэм сүрүн идиэйэтэ буолар, — диэн билинэр режиссер.
Маргарита Винокурова, көрөөччү, педагогическай үлэ бэтэрээнэ:
— Олус астына көрдүм саҥа сахалыы киинэни. Артыыстар олус да учугэйдик табыллан оонньоотулар. Артыыс Ньургун Бэчигэн, кыракый Миша Слепцов киһи итэҕэйэр курдук оруолларын толордулар. Мин киинэни көрө олорон, хаста да ытаатым…
Өрдөөҕүтэ Кыталык Уйбаан кинигэтин олус сэргээн аахпытым. Уопсайынан да, саха оҕолоро олус талааннаахтар эбит. «Каринаҕа» да оонньообут София Прибылых, аны бу Уйбаан уолчаан (Миша Слепцов). Киһи эрэ үөрэр маннык дьоҕурдаах, талааннаах үүнэр эрэр ыччаттаахпытыттан.
И.Петрова бэлэмнээтэ