Т.И. Скрыбыкина аатынан Сордоҥноох орто оскуолата саҥа үөрэх дьылын 30-ча үөрэнээччилээх көрүстэ. Оскуола боруогун Алина Винокурова аан маҥнай атыллаан, сибэкки дьөрбөтө тутуурдаах бастакы кылааска үөрэнэ кэллэ.
Билии аартыгар үктэммит кырачааны эдэр учуутал Екатерина Стручкова үөрэтиэҕэ, кэрэҕэ-сырдыкка сирдиэҕэ.
Алина эрдэттэн ийэтин кытта дьаныһан туран үөрэҕин тээбиринин бэлэмнэнэн, хоһоонун кыһамньылаахтык үөрэтэн, суумка сүгэһэрдээх оскуолаҕа барарын олус күүппүтэ.
Кыыһы төрөппүттэрэ Зарина уонна Альберт, эбэтэ Венера Егорова, эһэтэ Владимир Канаев уонна оҕо саадын уһуйааччылара үөрүүлээх күҥҥэ оскуолаҕа кэлэн билии аартыгар атаардылар.
Кыысчаан бу бэлиэ күн «Суолталааҕы кэпсэтии» диэн олоҕор бастакы кылаас чааһыгар сырытта. Балаҕан ыйын 2 күнэ Алинаҕа умнуллубат үтүө өйдөбүнньүк буолан өйүгэр-санаатыгар хаалара саарбахтаммат. Манна даҕатан эттэххэ, саҥа үөрэх дьылыгар Сордоҥноох оскуолатыгар төрдүс кылааска эмиэ соҕотох үөрэнээччи киирдэ.
Алина ийэтэ Зарина Владимировна маннык эттэ:
— Кыыһым кылааска соҕотоҕун үөрэнэриттэн олус долгуйар, сороҕор толло саныыр. Үөрэнэн бардаҕына санаата уларыйыа диэн эрэнэбин. Кылааһыгар соҕотох да үөрэнээччи буоллар, биһиги кыысчааммыт учууталын кытта биир тэтимҥэ буолан, үөрэҕи ылынарыгар баҕарабыт.
Евдокия Егорова