Дьылҕа-Хаан ыйааҕа кытаанах. Күндүтүк саныыр, таптыыр балтыбытын, эдьиийбитин Орто дойду олоҕуттан сүтэрбиппит номнуо биир сыл буолла.
Былырыын балаҕан ыйын 27 күнүгэр Жиркова Екатерина Титовна уһун ыарахан ыарыы кэнниттэн күн сириттэн күрэммитэ.
Катя Томтор орто оскуолатын ситиһиилээхтик бүтэрэн, баран, « Оскуола- производство- үрдүк үөрэх» диэн оччотооҕу хомуньуус баартыйатын ыҥырыытынан икки сыл «Өймөкөөн» сопхуоска ыанньыксытынан үлэлээбитэ.
Онтон Орто Халыма оройуонун Лобуйатыгар биир сыл кыыл иитээччи үөрэҕэр үөрэнэн кэлэн, Томторго “Саһыл” ферматыгар үлэлээбитэ. Катя эрдэ тулаайах хаалан, эдьиийдэрэ устудьуоннуур сылларыгар, балтыларын, бырааттарын көрбүтэ. 1981 сыллаахха Благовещенскай куоракка тыа хаһаайыстыбатын институтугар үөрэнэн, зоотехник идэтин баһылаабыта.
Екатерина Титовна үөрэҕин бүтэрэн, төрөөбүт дойдутугар кэлэн, «Өймөкөөн» сопхуоска аны зоотехнигынан үлэлээбитэ. Кини 1994 сылтан олоҕун бүтэһик күннэригэр диэри ветеринарнай сулууспа аптекатыгар сэбиэдиссэйдээбитэ.
Е.Т. Жиркова ханнык да дуоһунаска үлэлээтэр, дьыалатыгар олус кыһамньылаахтык, эппиэтинэстээхтик сыһыаннаһара, туох баар билиитин-көрүүтүн биэрэрэ. Онон кини элбэх Бочуотунай грамоталарынан, сыаналаах бэлэхтэринэн наҕараадаламмыта.
Е.Т. Жиркова 2018 сыллаахха Тыа хаһаайыстыбатын министиэристибэтин Бочуоттаах грамотатынан уонна анал бэлиэтинэн наҕараадаламмыта. 2022 сыллаахха киниэхэ СӨ «Ветеринарнай сулууспатын туйгуна» бэлиэ туттарыллан, сыралаах үлэтэ үрдүктүк сыаналаммыта.
Балтыбыт, эдьиийбит барахсан хаһаайка бастыҥа этэ. Кини дьиэтин аана ыалдьыттарга мэлдьи аһаҕас буолара, минньигэс, толору астаах остуолугар кинилэри үөрэ-көтө ыҥырара.
Катя сайаҕас, сымнаҕас майгылааҕа, аймахтарын, доҕотторун кыһалҕаларын тэҥҥэ үллэстэр, көмөлөһөр үгэстээҕэ. Күнэ-ыйа таптыыр сиэннэриттэн тахсара, кыыстаах уола өрүүтүн аттыгар буолаллара. Балтыларыгар, бырааттарыгар куруутун сүбэ-ама биэрэрэ, кинилэр үөрэхтээх, үтүө үлэһит дьон буолалларыгар бары күүһүн, сыратын уурбута.
Катя наһаа элбэх ыра санаалаах этэ. Олох салҕанар. Оҕолоро, сиэннэрэ Катябыт ситэ олорботох олоҕун, кини сиппэтэх ыра санаатын ситиһиэхтэрэ.
Катябытын ахтабыт, саныыбыт, кини биһиги сүрэхпитигэр өрүү тыыннаах.
Бииргэ төрөөбүттэрэ, аймахтара