Кыһыммыт маҥан хаарынан үллүктээтэр да, көмүс күһүммүтүн атаарбыппытын санаан, ахтан ылабыт.
Балаҕан ыйын бүтүүтэ «Тымныы оройо» кулууп дьиэтигэр Н.О.Кривошапкин аатынан оскуоланы кытта «Күһүн бэлэҕэ»диэн бэртээхэй атыы-тутуу дьаарбаҥката, күрэхтэһиилэр (оригинальнай бүлүүдэлэр, саамай улахан оҕуруот аһа, айылҕа матырыйаалыттан оҥоһуктар, «Авангард»көстүүм, дьикти-дьиибэ быһыылаах көстүүлээх айылҕа бэлэҕэ, эҕэрдэлэр) тэриллибиттэрэ.
Кылаастар кыһаллан-мүһэллэн ас арааһын астаан остуолларыгар тэлгэппиттэрэ.
Мустубут ыалдьыттары тапталлаах ырыаһыттарбыт Өймөкөөн Сэмэнэ, Федор Шпнев ,Айар Старков кэрэ куоластарынан эҕэрдэлээн сэргэхсиппиттэрэ.
Кулууп уус-уран салайааччыта Филипп Захаров оонньуу тэрийэн оҕолор үөрэ-көтө кыттыбыттара, биир сонун көстүү этэ.
Бары бу дьоро киэһэттэн астынан, өттүк харалаах, үөрэн-көтөн тарҕаспыттара.
Маннык тэрээһиннэр өссө да буолуохтара оҕолордуун, төрөппүттэрдиин, ыалдьыттардыын бары түмсэр олус бэрт.
Бу туһунан сиһилии “Хотугу сардаҥа” хаһыакка ааҕаарыҥ.
Найаана Корякина, 7-с кылаас, Өймөкөөн