Өймөкөөн улууһун ытыктанар олохтоохторуттан биирдэстэрэ Марианна уонна Илья Тарковтар сүрэхтэринэн сөбүлэһэн, харахтарынан хайҕаһан ыал буолан олорбуттара номнуо 50 сыл буолла.
Тарковтар дьиэ кэргэннэрэ улууска тыа хаһаайыстыбатын салаата кэлимник сайдыытыгар бэйэлэрин улахан кылааттарын киллэрбит дьон. Ыал ийэтэ Марианна Дмитриевна биологическай билим хандьыдаата өр сылларга үтүө суобастаахтык бэтэринээринэй сулууспа эйгэтигэр үлэлээбитэ, улуустааҕы бэтэринээринэй-чинчийэр лабораторияны сатабыллаахтык салайбыта. Оттон ыал аҕа баһылыга Илья Яковлевич таба иитиитигэр таһаарыылаахтык үлэлээн-хамсаан, “Мола” аҕа ууһунан общинаны тэрийэн үлэлээбитэ хас да сыл буолла.
Биһиги дьиэ кэргэн кинилэр үйэ аҥаара бииргэ олорбуттарын бэлиэтиир дьоро киэһэлэригэр баай-талым, мааны сандалыларын ыҥырыылаах ыалдьытынан буоллубут.
Күндү дьоммут Марианна Дмитриевна, Илья Яковлевич! Ыал эрэ маннык үрдүк өрөгөй дьолго тиксибэтинэн, оҕолоргут, сиэннэргит этэҥҥэ сырыттыннар, бэйэҕит ис туруккут, доруобуйаҕыт чөл, чэбдик, игири-сигири буоллун диэн Аар Айыылартан Алгыстаах тыллары аныыбыт!
Мэлдьи да бу курдук күлэ-үөрэ, ылыммыт тэтимҥитин кыл түгэнигэр даҕаны ыһыктыбакка, мөлтөтөн-ахсатан көрүмэҥ диэн баҕа санаабыт бастыҥын аныыбыт. Салгыы даҕаны таптыыр, үллэр үөрүйэхтээх, олус наадалаах үлэҕитинэн сүрэххит баҕатынан сүһүөххүт уйарынан дьарыгырыҥ.
Күндү көмүс оҕолоргутун, сиэннэргитин харах далыгар илдьэ сылдьан, үлэ үөрүйэхтэригэр үөрэтиҥ, олох эндирин, үөрүүтүн, өрөгөйүн үөһэ тутан, өрүү үөрэ-көтө сылдьыҥ.
Дьоллоох буолуҥ, доруобай буолуҥ!
Валентина Михайловна, Прокопий Николаевич Ксенофонтовтар, Дьокуускай.
Сиһилии “Хотугу сардаҥа” хаһыакка ааҕаарыҥ.