“Кыайыы Знамята” Өймөкөөҥҥө тохсунньу бүтүүтэ кэлиэҕэ

Бары бииргэ Кыайыыга” диэн девизтээх “Кыайыы Знамятын” эстафетата Саха сиригэр тохсунньу 9 күнүттэн Мэҥэ Хаҥалас улууһун Сыымах нэһилиэгиттэн саҕаламмыта. Бу нэһилиэккэ Сэбиэскэй сойуус Дьоруойа Федор Кузьмич Попов төрөөбүтэ.

Кыайыы Знамята салҕыы Амма улууһугар тиийдэ. Манна хас даҕаны нэһилиэккэ тыыл уонна үлэ бэтэрээннэрэ, бойобуой дьайыылар кыттыылаахтара мустан тыл эттилэр, эстафета устуоруйатыттан сырдаттылар, ыччат дьон ытык кырдьаҕастар ахтыыларын сэргии иһиттилэр.

Бу курдук хас улуус аайы истиҥ тэрээһиннэр, көрсүһүүлэр олохтоохтору биир тыыҥҥа сирдээн ыытыллан иһиэхтэрэ, уоттаах сэриигэ кыайыыны ситиспит хорсун буойуттар, тыылга эҥкилэ суох үлэлээбиттэр ахтыллыахтара, кинилэргэ дириҥ махтал бэлиэтэ түстэниэҕэ.

Өймөкөөн улууһугар Кыайыы Знамята тохсунньу 29 күнүгэр кэлэрин күүтэбит. Бу иннинэ тохсунньуга Знамя Уус Маайа, Алдан, Нерюнгри, Уус Алдан, Чурапчы, Таатта, Томпо улуустарыгар сылдьыаҕа.

Любовь Кривошапкина

 

Читайте дальше