Улууска 2019 сылтан норуоттар икки ардыларынааҕы “Өймөкөөн Тымныы полюһа” кыһыҥҥы экстремальнай марафон ыытыллар. 2021 сылтан Уус-Ньараҕа “Тымныы полюһа” альпинизм бэстибээлэ тэриллэр.
2021 с. кулун тутарыгар ыытыллыбыт “Тымныы полюһугар айан” ХХ үбүлүөйдээх өрөспүүбүлүкэтээҕи бэстибээлгэ ыраахтан-чугастан үгүс ыалдьыт, тас дойдулартан туристар мустубуттара.
Өймөкөөн улууһугар култуура уонна духуобунас сайдыытын чэрчитинэн олохтоох ааптардар уонна кыраайы үөрэтээччилэр 15 кинигэлэрэ бэчээттэнэн таҕыста. Бу кэм устата Уус-Ньараҕа уонна Томтор нэһилиэгэр киинэ саалалара аһылыннылар.
2022 с. Өймөкөөн, Амма уонна Уус-Маайа улуустарын өйөбүлүнэн Хабаровскайга ыам ыйыгар Саха АССР төрүттэммитэ 100 сыллаах үбүлүөйүн чэрчитинэн Ыһыах ыһыллыбыта. Оттон от ыйыгар Москубаҕа ыытыллыбыт үбүлүөйдээх Ыһыахха “Саха атынан –Москубаҕа” бырайыак кыттыылааҕа Дугуйдаан Винокуров бочуоттаах ыалдьытынан буолбута.
Өймөкөөн улууһун олохтоохторугар ааспыт сыл ураты дьылынан буолбута. Тымныы полюһугар “Айыы санаа айана” диэн өрөспүүбүлүкэтээҕи Олоҥхо Ыһыаҕа улахан суолталаах общественнай-бэлитиичэскэй уонна култуурунай тэрээһин быһыытынан үрдүк сыанабылы ылбыта. Саха сирин Ил Дархана Айсен Николаев тэрээһин бочуоттаах ыалдьытынан буолбута.
Өймөкөөн улууһун олохтоохторо бу кэмҥэ биир сомоҕо буолан Олоҥхо Ыһыаҕар кыралыын-эмэнниин кыттан, төрөөбүт түөлбэлэрин аар-саарга аатыртылар, араас омуктар түмсүүлээхтэрин көрдөрдүлэр.
Любовь Кривошапкина