Кинигэ – оҕо эрэллээх доҕоро

Оҕо көмүскэлин аан дойдутааҕы күнүнэн ситимнээн, улууспут нэһилиэктэрин оҕолорун кинигэни ааҕыы туһунан санааларын билистибит.

Алина Скрыбыкина, Т.И. Скрыбыкина аатынан Сордоҥноох орто оскуолатын 5-с  кылааһын үөрэнээччитэ:

— Мин саамай остуоруйалары ааҕарбын сөбүлүүбүн. Эбэм Лидия Алексеевна уонна эһэм Семён Петрович Скрыбыкиннар Горнай оройуонуттан миэхэ остуоруйалаах кинигэлэри кэһии гынан ыытааччылар. Биир оннук «Былыыр-былыр…» диэн ааттаах. Уонна өссө мин «Үтүө майгы» диэн энциклопедияны сөбүлээн аахпытым.

«Уйбаанчык сурус уонна Олоончук эдьиий» диэн аудио-остуоруйаттан Олоончугу ордук астыммытым. Кини сайаҕас, олус өйдөөх кыыс. Олоончук эдэр ааҕааччыны толкуйдаах уонна болҕомтолоох буоларга үөрэтэр.

Нэһилиэкпит бибилэтиэкэрэ Мария Никифорова оҕолору элбэхтик ааҕарга көҕүлүүр, араас сүбэлэри биэрэр. Мин санаабар, кинигэ оҕолору үтүө санаалаах, кыһамньылаах, аламаҕай майгылаах буоларга үөрэтэр. Ол иһин кинигэ ааҕар олус наадалаах, өй биэрэр, биһиги кинигэттэн элбэҕи билэбит. Кинигэ – киһи эрэллээх доҕоро.

Баир Винокуров, П.В. Заболоцкай аатынан Үчүгэй орто оскуолата, 2-с кылаас: 

— Кинигэ киһиэхэ элбэх билиини биэрэр, өйгүн сайыннарар, кинигэни аахтаххына саҥа тыллары билэр буолаҕын. Мин бибилэтиэкэттэн элбэх остуоруйалары, кэпсээннэри уларсан аахпытым. Киһи аахпыт кинигэлэрин дьоруойдарын курдук хорсун, өйдөөх, аһыныгас буоларга үөрэнэр.

Үчүгэй нэһилиэгин бибилэтиэкэрэ Наталья Громова куруутун араас тэрээһиннэри ыытар, эдэр ыччаты ааҕарга көҕүлүүр. Мин сөбүлүүр дьоруойум — дьээдьэ Степа. Кини наһаа өйдөөх, үчүгэй майгылаах, дьоҥҥо барытыгар көмөлөһөргө дьулуһар. Мин кини курдук буолуохпун баҕарабын. Оҕолорго баҕарыам этэ — кинигэни элбэхтэ ааҕыҥ, оччоҕо дириҥ билиилээх буолуоххут.

Дайаана Антонова, Н.М. Заболоцкай аатынан Томтор орто оскуолата, 8-с кылаас:

— Мин көрдөөх кэпсээннээх кинигэлэри ааҕарбын сөбүлүүбүн. Ааҕарбар сүрүн дьоруойдар эйгэлэригэр айанныыбын. Баай фантазиялаах, кэрэхсэтиилээх сэһэннэри ааҕарбын ордоробун. Айымньы сүрүн ис хоһоонугар ордук интэриэспин уурабын. Кинигэ ааҕыы туспа бэйэтэ дьарык буолар. Биһиги Томтордооҕу бибилэтиэкэҕэ сылдьааччыбыт, библэтиэкэ үлэһитэ Надежда Литвинцева интэриэһинэй тэрээһиннэри ыытар. Киниэхэ махталбын тиэрдиэхпин баҕарабын. Мин сөбүлүүр дьоруойум – Буратино. Көмүс күлүүсчээн туһунан оҕо айымньыта миигин мүччүргэннээх сырыылара интэриэһиргэтэр. Буратино хорсун санаалаах уолчаан, кини туруоруммут сыалын ситиһэр.  Кинигэни ааҕыы сөптөөхтүк бириэмэни атаарыы уонна билии-көрүү таһымын сайыннарыы буолар дии саныыбын.

Саргын Сивцев, Н.О. Кривошапкин аатынан Өймөкөөн орто оскуолата, 2-с кылаас:

— Мин кыыллар тустарынан энциклопедиялары, кэпсээннэри, саха суруйааччыларын хоһооннорун сөбүлээн ааҕабын. Ону таһынан оҕолорго аналлаах кылгас кэпсээннэри, остуоруйалары истэрбин сөбүлүүбүн. «Хорошие манеры» диэн тэттик кэпсээннэртэн «Пик» диэн ааттаах кутуйах дьоруойун сөбүлээн аахтым. Ол кутуйах ийэтин тылын истибэккэ дьиэтиттэн куотар. Соҕотох сылдьан араас кутталга түбэһэр. Сыыһатын өйдүүр, ийэтиттэн кэлэн бырастыы көрдөһөр уонна дьиэтиттэн хаһан да куоппат буолар.

Кинигэ – билии төрдө буолар. Кинигэни элбэхтик ааҕар оҕо элбэҕи билэр. Оскуолабыт бибилэтиэкэрэ Агафья Готовцева оҕолору дьаныһан туран ааҕарга үөрэтэр, элбэҕи сүбэлиир.

Миша Атласов, Г.А. Кривошапкин аатынан Төрүт орто оскуолата, 9-с кылаас:

— Мин мүччүргэннээх сырыылар тустарынан кинигэлэри уонна детективтэри ааҕарбын ордоробун. Кинигэ киһиэхэ элбэх билиини-көрүүнү биэрэр, олоххо үөрэтэр, сырдыкка-кэрэҕэ угуйар. Нэһилиэкпит бибилэтиэкэрэ Нина Чачуа араас тиэмэлээх интэриэһинэй дьаһаллары тэрийэн ыытарын таһынан, оҕолорго инники олохторугар наадалаах буоллун диэн үгүс  туһалааҕы, кэскиллээҕи сүбэлиир-амалыыр.  Инникитин биһиги бибилэтиэкэбит өссө элбэх ааҕааччылаах буоларыгар баҕарабын. Ким ааҕар — ол элбэҕи билэр.

Евдокия Егорова

 

Читайте дальше