Соторутааҕыта убаастыыр учууталбыт, СӨ үөрэҕириитин туйгуна, Саха сирин мелодистарын Ассоциациятын чилиэнэ, үлэ бэтэрээнэ Кондаков Власий Семёнович төрөөбүтэ 80 сылыгар аналлаах «Өймөкөөн – бу тымныы полюhа» диэн ааттаах иhирэх ахтыы киэһэтэ олус долгутуулаахтык, ис дууһаттан өрө көтөҕүүлээхтик ааста.
«Тапталлаах мин кыһам» диэн оскуолабыт гимнинэн үөрэнээччилэр уонна учууталлар дьоро киэһэни арыйдылар. Бу ырыа тылын оччолорго 10-с кылаас үөрэнээччитэ Олимпиада Сивцева суруйбута, онтон мелодиятын В.С. Кондаков айбыта. Ырыа Өймөкөөн орто оскуолатын 70 сылыгар анаммыта.
Дойдубут барахсаны тыйыс тымныылар бүрүйэн турар кэмнэригэр, сылаас тыыннаах биэчэри «Чуораанчык» уһуйаан квартета чуопчаарар куолаһынан киэргэттэ. Ол курдук кинилэр Власий Кондаков мелодиятыгар Сардаана Аммосова салайыытынан “Үөрүү” уонна “Саҥа дьыл киэһэтэ” диэн ырыалары олус истиҥник толордулар. Мустубут дьон Валерия Боронцоева куйаар ситиминэн ыыппыт бэртээхэй үҥкүү-эҕэрдэтин үөрэ көрдүлэр
Власий Семенович үөлээннээҕэ, доҕоро, мелодист Петр Дьячковскай «Музыкант кэриэһигэр» диэн ырыаны ис сүрэҕиттэн долгуйан туран ыллаата.
Өрөспүүбүлүкэҕэ тиийэ биллибит кэрэ аҥардар “Туйаарыма” ырыа ансаамбыллара “Өймөкөөн бу тымныы полюһа” диэн мелодист суруйбут ырыатын саҥа тыыннаан, мустубут дьоҥҥо бэлэх ууннулар.
Ол быыһыгар күөх экранынан быыстала суох ыраахтан-чугастан эҕэрдэлэр кэлэ турдулар.
Ону таһынан ахтыылары кыраайы үөрэтээччи, Власий Семенович бииргэ үлэлээбит үөлээннээҕэ Тамара Васильева, үөрэппит оҕолоро оҥордулар. «Өймөкөөнүм вальсыгар» диэн дьон сөбүлүүр ырыатыгар доҕуһуоллатан, учууталлар вальстаан ыллыбыт.
Ити курдук Өймөкөөнү ааттатар мелодиспытын, ытык учууталбытын истиҥник-иһирэхтик санаан-ахтан аастыбыт. Дьоро күҥҥэ В.С. Кондаков кыыһа, СӨ үөрэҕириитин туйгуна, үрдүк категориялаах алын сүһүөх кылааһын учуутала Галина Власьевна үөрэммит оскуолатыгар радиомикрофон бэлэх уунна.
Кондаков В.С. ырыалара өссө да ыллана туруохтара, кэлэр көлүөнэ ыччат кини аатын киэҥ сураҕырда туруоҕа диэн биир дойдулаахтара эрэнэбит.
Сиһилии – “Хотугу сардаҥа” хаһыакка.
Агафья Готовцева, общ. корр., Өймөкөөн