Тохсунньу 4-6 күннэригэр Уус-Алдан улууһун Бороҕонугар Саха сирин физкультурнай хамсааһынын 100 сылыгар аналлаах биллиилээх спортсмен Н.Н. Тарскай кэриэһигэр көҥүл тустууга турнир буолан ааста. Күрэххэ биирдиилээн уонна хамаанданан бастыыр иһин өрөспүүбүлүкэтээҕи 52-с чемпионакка 21 хамаандаттан уопсайа 186 бөҕөс кыттыыны ылла.
Бу турнирга биһиги биир дойдулаахпыт, Томтор нэһилиэгиттэн төрүттээх Любомир Ашеин кытынна. Киниттэн киэҥ далааһыннаах спортивнай тэрээһин түмүгүн туһунан ыйыталаспыппытыгар, маннык кэпсээтэ:
— Өрөспүүбүлүкэбит үгэскэ кубулуйбут күрэҕэ үрдүк тэрээһиннээхтик ыытыллан, этэҥҥэ түмүктэннэ. Турнирга бэйэм кыттыым туһунан эттэххэ, хомойуох иһин, финалга хотторон хааллым. Дьиҥэр, бу улахан таһымнаах күрэхтэһиигэ бастыырдыы оҥостон тиийбитим. Чемпионакка хас биирдии бөҕөс күүскэ бэлэмнэнэн кэлбитэ көһүннэ. Мин 57 киилэҕэ кииристим.
Түгэнинэн туһанан, миэхэ күүс-көмө, өйөбүл буолбут тренердэрбэр — Томтордооҕу оҕо спортивнай оскуолатын көҥүл тустууга уһуйааччыта Владимир Саввиновка уонна Чурапчытааҕы тренербэр Альберт Макаровка дьарыктаабыттарыгар махталбын тиэрдэбин.
Хаартыскаҕа: Көбүөргэ Өймөкөөн улууһун Томтор нэһилиэгин бөҕөһө Любомир Ашеин
Бу иннинэ үчүгэй турукка сылдьыбытым, күүстээх спортивнай сбордары ааспыппыт. 10-ча күннээҕитэ Красноярскай куоракка СССР үтүөлээх тренерэ Д.Г Миндиашвили кэриэһигэр аналлаах турнирга күрэхтэһэн кэлбитим. Онно 234 тустуук көбүөргэ тахсыбыта. Бу күрэххэ кыттыбыт бөҕөстөр тохсунньу 25 күнүгэр ыытыллар норуоттар икки ардыларынааҕы аатырбыт Иван Ярыгин кубогар киирсэргэ бэлэмнэнэ сылдьабыт. Билигин Дьокуускай куоракка Триумф спортивнай кииҥҥэ икки нэдиэлэлээх сборга киирэн дьарыктанабын.
— Биир дойдулаахтарбар, миэхэ өрүү ыалдьар чугас дьоммор өйөбүлгүт иһин, буолаары турар И.Ярыгин киэҥ хабааннаах күрэхтэһиитигэр тустарбар үп-харчы өттүнэн көмөлөспүккүтүгэр махталым муҥура суох. Биллэн турар, түмүк бэйэбиттэн эрэ тутулуктаах, инникитин кыайыылар кэлиэхтэрэ диэн эрэнэбин, — диэн санаатын үллэһиннэ биир дойдулаахпыт, Россия успуордун маастара Любомир Ашеин. Биһиги эмиэ уолбутугар эрэнэбит, оннук эрэ буоллун.
Евдокия Егорова суруйда