Өймөкөөн улууһун дьаһалтатын баһылыгын э.т. Саргылаана Можукова оройуон сиригэр-уотугар быйылгы оттук сезонун түмүктээһиҥҥэ уонна кэлэр дьыл — 2024/2025 сыллардааҕы оттук сезонугар бэлэмнэниигэ туһуламмыт б.д.ь ыам ыйын 15 күнүгэр 53 уонна 54 нүөмэрдээх икки Уурааҕы таһаарда .
Докумуоҥҥа ыйылларынан, улууска оттук сезона б.дь. ыам ыйын 31 күнүгэр түүн 12 чааска түмүктэниэҕэ («СЗ», ыам ыйын 17 к. билсиэххэ сеп). Оттук кэмэ Өймөкөөн улууһун сиригэр-уотугар +8С кыраадыс 5 күн устата турбутун кэнниттэн тохтотуллар.
Итиэннэ уураахха улуус олох-дьаһах хаһаайыстыбатын бары тэрилтэлэригэр, социальнай эйгэ уонна олорор дьиэ пуондатыгар кэлэр оттук сезонугар киирэргэ бэлэмнэнии үлэтин тэрийэргэ сорудахтанна.
Санатахха, оттук сезонун түмүктүүр туһунан быһаарыыны муниципальнай тэриллиилэр бэйэлэрэ ылыналлар.
ДьКХ министиэристибэтин пресс-сулууспата иһитиннэрэринэн, хоту улуустартан оттук сезона саамай хойутуу, бэс ыйын 18-19 күннэригэр Усуйаанаҕа уонна бэс ыйын 23 күнүгэр Аллайыахаҕа түмүктэниэҕэ.
Халаан уутуттан эмсэҕэлээбит оройуоннарга оттук сезона уһатыллара сабаҕаланар. Ол туһунан быһаарыыны олохтоох бэйэни салайыныы уоргана өҥөнөн хааччыйааччы тэрилтэни кытта ылыныахтаахтар.
Биһиги корр.