Искусственнай ардаҕы аҕалааччы сөмөлүөттэр ыам ыйын 15 күнүттэн үлэлэрин саҕалыахтара

Саха сиригэр кураан сайын буолара күүтүллэр. Ол ойуурга уот турарыгар сылтах буолуоҕун сөп.

Ыам ыйын 15 күнүттэн искусственнай ардаҕы аҕалар зондировщик сөмөлүөттэр үлэлэрин саҕалыахтара. Ол туһунан дьаһалы Ил Дархан Айсен Николаев ЧС хамыыһыйатын мунньаҕар эттэ.

«Ылыллар миэрэлэри барытын эрдэттэн оҥоруохха наада. Дьон дьалаҕай сыһыаныттан умайыы тахсыытын бохсуохха наада. Оттон баһаар тахсар түгэнигэр бастакы хонуктан умуруорууга күүскэ ылсыахха наада», – диэтэ Айсен Николаев.

Регион салалтатын пресс-сулууспата иһитиннэрбитинэн, бу күннэргэ «Полярные авиалинии» АХ Ан-26 бортугар искусственнай сөҥүүнү ыҥырар тэрили туруоруу барар. Маны сэргэ Новосибирскайтан «Росгидромет» Як-40 сөмөлүөтэ кэлэр.

Зондировщиктар ыам ыйын 15 күнүттэн үлэлииргэ бэлэмнэр.

Ыам ыйын 13 күнүнээҕи туругунан, ойуур баһаара өрөспүүбүлүкэҕэ бэлиэтэммэт.

 ЯСИА саайтыттан

Читайте дальше