Эрдэ эрэдээксийэ Телеграм-ханаалыгар иһитиннэрбиппит курдук, бу дьыл от ыйын 11 күнүгэр 34 №-дээх быыбардыыр уокурук быыбардыыр хамыыһыйата (ОИК) 34 №-дээх СӨ Халыма-Индигирдээҕи биир мандааттаах быыбардыыр уокурукка үс норуот дьокутаатыгар хандьыдааттары регистрациялаабыта.
— Слепцов Евгений Михайлович – “Биир ньыгыл Арассыыйа” бэлитиичэскэй баартыйа туруоруута;
— Шадрин Вячеслав Иванович, “Новые люди” бэлитиичэскэй баартыйа Саха Өрөспүүбүлүкэтигэр салаатын туруоруута;
— Швец Александр Сергеевич, “Родина” бэлитиичэскэй баартыйа Саха Өрөспүүбүлүкэтигэр салаатын туруоруута.
Санаттахха, ЛДПР бэлитиичэскэй баартыйа туруорбут хандьыдаата Макаров Семен Витальевич бу дьыл бэс ыйын 27 күнүгэр регистрацияламмыта.
ОИК бэрэссэдээтэлэ Елена Новикова бэлиэтээбитинэн, хандьыдааттары туруоруу уонна регистрациялааһын быыбар сокуонугар олоҕуран ыытылынна.
Ол быһыытынан, СӨ Халыма-Индигир биир мандааттаах быыбардыыр уокуругун норуот дьокутаатыгар эбии быыбарга хандьыдааттар бары быһаарылыннылар.
Быыбар куоластааһын биир кэлим күнүгэр – 2024 с. балаҕан ыйын 8 күнүгэр — ыытыллыаҕа.
Ирина Петрова