Сэтинньи 29 күнүгэр Ил Түмэн уочараттаах төрдүс пленарнай мунньаҕар Ил Дархан Айсиэн Николаев өрөспүүбүлүкэ 2024 сыллааҕы бүддьүөтүн көннөрөн-эбэн биэриигэ этии киллэриитэ көрүлүннэ. Боппуруоһу дьокутааттар иннилэригэр парламент бүддьүөккэ, үпкэ, нолуокка уонна сыана бэлиитикэтигэр сис кэмитиэтин бэрэссэдээтэлэ Юрий Николаев туруорда.
Юрий Михайлович билиһиннэрбитинэн, Ил Дархан этиитэ тыа сирин өйөөһүҥҥэ сыһыаннаах. Бастатан, соҕотуопкаланар үүт 1 киилэтигэр өрөспүүбүлүкэ бүддьүөтүттэн көрүллэр субсидия ыстаапкатын 60 солкуобайтан 65 солкуобайга диэри улаатыннарыы. Иккиһинэн, кэтэх сүөһүлээх ыаллар ынахтарыгар бэриллэр көмө харчыны 37 тыһ. солкуобайтан 39 тыһ. солкуобайга диэри үрдэтии. Үсүһүнэн, тыа хаһаайыстыбатын табаарын оҥорон таһаарааччылары үп-харчы өттүнэн өйүүр сыаллаах саха сүөһүтүн иитииттэн саҕалаан астыыр-үөллүүр тэрилтэлэри чэбдигирдиигэ үп көрүллэригэр этиилээх.
Туһааннаах сис кэмитиэт салайааччыта бу этиллэр хайысхалары олоххо киллэриигэ 2024 сыллааҕы бүддьүөккэ резервэ пуондатыттан 500 мөл. солкуобай эбии көрүллэрин иһитиннэрдэ. Дьокутааттартан ким даҕаны ыйыппата даҕаны уонна эппэтэҕэ даҕаны. Боппуруос бүттүүн куоластааһыҥҥа туруоруллубутугар мунньахха кыттыбыт 61 дьокутааттан 57 киһи сөбүлэстэ, биир утарда, биир туттунна уонна 2 дьокутаат санаатын биллэрбэтэ. Онон, Ил Дархан этиилэрэ биир санаанан өйөннүлэр диэххэ сөп.
Василий Никифоров
Ил Түмэн пресс-сулууспатын хаартыската