Ил Дархан Айсен Николаев ааспыт нэдиэлэҕэ Орто Халымаҕа сырыытын кэмигэр Тыа хаһаайыстыбатын уонна Аартыканы сайыннарыы министиэристибэлэригэр туһаайан, тыа хаһаайыстыбатын сайыннарыы концепциятын бу сыл алтынньы 1 күнүгэр диэри оҥороллоругар сорудахтаата.
Тыа хаһаайыстыбатын министиэристибэтин билгэлээһиҥҥэ, былааннааһыҥҥа уонна судаарыстыбаннай бырагыраамаларга департаменын салайааччыта Анастасия Колодезникова иһитиннэрэринэн, сорудах сүнньүнэн үлэ саҕаланан эрэр, икки министиэристибэ салайааччылара, исписэлиистэрэ мунньахтаан, концепция (көрүк) сүрүн балаһыанньаларын дьүүллэһиэхтэрэ, чопчулуохтара. Санатар буоллахха, Саха сирин арҕаа эҥээрин сайыннарыы көрүгэ оҥоһуллан үлэлии сылдьыбыттаах. Докумуон онно майгыннатан оҥоһуллуон сөп итиэннэ кылгас кэмҥэ оҥоһуллан, быһаччы бырабыыталыстыба бигэргэтиитигэр киирэрэ күүтүллэр.
– Дьон Саха сиригэр кэтэх хаһаайыстыбалаахтарга баар ынах уонна биэ төбөлөрүгэр көрүллэр көмө харчы кээмэйэ барыларыгар үрдэтиллэр курдук өйдөөбөттөрүгэр көрдөһөбүн, – диир Анастасия Дмитриевна. – Бу докумуон чопчу Аартыка түбэтигэр киирэр 13 хотугу улууска сыһыаннааҕын быһыытынан, субсидия ити улуустар кэтэх ынахтарыгар уонна тэрээһиннээх хаһаайыстыбалар биэлэригэр үрдэтиллиэҕэ. Кинилэргэ билигин көмө харчы кээмэйэ киин улуустары кытта тэҥ: ынахха – 37 тыһ. солкуобай, биэҕэ – 5 тыһ. солкуобай. Ону сэргэ тэрээһиннээхтэр (бааһынай хаһаайыстыбалар, кэпэрэтииптэр) эмиэ ынах төбөтүгэр 45-тии тыһ. солкуобайы ылаллар. Хоту эҥээргэ үүт харчытыгар Үөһээ Дьааҥы улууһугар баар “Алгыс” кэпэрэтиип диэн соҕотох хаһаайыстыба үлэлиир. Хотугу улуустарга дьиэ табатын иитии сүрүн салаалара буоларынан, таба төбөтүгэр быһыллар тирэх ыстаапканы үрдэтиини эмиэ көрүөхпүт. Субсидия көрүҥнэринэн төһө үрдэтиллиэҕин билигин этэргэ эрдэ. Улуустартан этиилэр киирдэхтэринэ, көрөн-үөрэтэн баран, сөптөөх диэбит кээмэйдэрбитин олохтуохпут.
Хотугу улуустар өрөспүүбүлүкэҕэ оҥоһуллар тыа хаһаайыстыбатын бүттүүн бородууксуйатын 4 эрэ бырыһыанын оҥорон таһаараллар. Омос көрдөххө, дуона суох эрээри, хотугу аҕыйах ахсааннаах норуоттар омук быһыытынан харысхаллаах буолалларын, төрүт укулааттарын тутан олороллорун мэктиэлииргэ табаны, ынах сүөһүнү, сылгыны иитии салааларыгар өйөбүл үрдэтиллэрэ сүҥкэн суолталаах.
Үөһээ Халыма улууһунааҕы тыа хаһаайыстыбатын салалтатын салайааччыта Гаврил Сивцев саныырынан, субсидия кээмэйэ билиҥҥи олохтоммутуттан хотугу улуустарга икки бүк үрдэтиллиэн сөп, холобур, ынах төбөтүгэр – 70 тыһ. солкуобай, биэҕэ – 10 тыһ. солкуобай.
Василий НИКИФОРОВ
Хаартыска: «Хаҥалас» хаһыат