Балаҕан ыйын 24 күнүгэр Саха Өрөспүүбүлүкэтин Судаарыстыбаннаһын күнүн көрсө Саха сирин Ил Дархана Айсен Николаев быһа эпииргэ таҕыста.
Елена Иванова, Томтордооҕу “Кэскил” уһуйаан иитээччитэ:
Айсен Сергеевич, хаһан буоларын курдук, Саха сирин олохтоохторун кытта быһа эпииргэ тахсан, суолталаах боппуруостары барытын таарыйда. Миигин, педагог быһыытынан, биллэн турар, үөрэхтээһин эйгэтигэр сыһыаннаах боппуруос долгутар. Дойдуга кэлиҥҥи сылларга национальнай бырайыактар олоххо кэлимник киирбиттэрэ кэрэхсэтэр. “Үөрэхтээһин”, “Доруобуйа харыстабыла”, “Култуура” о.д.а. нацбырайыактар чэрчилэринэн өрөспүүбүлүкэҕэ үгүс тутуу ыытылынна, саҥа сүүрээн киирдэ. РФ бэрэсидьиэнэ Владимир Путин салҕыы саҥа национальнай бырайыактар олоххо киириилэрин көҕүлээбитэ. Ол аата инники диэки эрэллээхтик хардыылаан иһэрбитигэр олук ууруллар, олохпут биир сиргэ турбат.
Быһа эпииргэ биир дойдулаахпытыттан биһигини барыбытын долгутар – суол-иис туругар сыһыаннаах боппуруос киирбитэ болҕомтото суох хаалбата. Ил Дархан Айсен Николаев “Халыма” федеральнай трасса туругун таһынан, өрөспүүбүлүкэтээҕи “Өймөкөөн” суолугар сорох учаастактар уһун ардахтар кэннилэриттэн элбэхтэ саахалланалларын билэрин, бу кыһалҕа туһунан дойду салайааччыта В.В. Путин Дьокуускайга кэлэ сырыттаҕына иһитиннэрбитин санатта. Төһө даҕаны суолу-ииһи өрөмүөннээһини, көрүүнү-истиини үбүлээһин бүтүн Арассыыйа үрдүнэн намтаабытын үрдүнэн, Ил Дархан РФ таһымнаах салайааччылар бу сытыы боппуруоска тустаах болҕомтолорун ууралларыгар эрэнэрин биллэрдэ.
Любовь КРИВОШАПКИНА