Уруйдаммыт Олоҥхобут Ыһыаҕа быйыл үтүөкэн дьоннордоох, олус кэрэ айыҕалаах, аан дойдуга тымныытынан биллибит ыраах Өймөкөөн улууһун Томторугар олус бэрткэ, өрө көтөҕүллүүлээхтик буолан ааста.
Ыһыах саамай мааны түһүлгэтэ — саха таҥаһын күрэҕэ – үгэс курдук элбэх кыттааччылаах уонна көрөөччүлээх буолла. Куонкуруһу Мэҥэ Хаҥалас Олоҥхотун дьиэтин кэлэктиибэ (сал. Е.Н. Иванова) эриэккэс бэйэлээхтик аста. Быйылгы күрэххэ, эрдэттэн биллэриллибитин курдук, аҕыйах ахсааннаах норуоттар таҥастарын көрүү эмиэ киллэриллибитэ түһүлгэбитин олус киэргэттэ.
Үгэс буолбут саха таҥаһын тигиигэ бириистээх миэстэлэри ылбыт араас улуус бэрэстэбиитэллэрэ ботуччу харчынан бириэмийэлэннилэр.
Быйыл эр киһи таҥаһыгар түһүмэх биллэриллибитэ эрээри, онно кыттааччы олох аҕыйах диэххэ сөп. Миэстэбит бирииһин былдьатымаары, атын түһүмэхтэртэн үчүгэйдик тигиллибит эр дьон таҥаһын киллэрэн биэрдибит.
Өймөкөөнтөн төрүттээх медик, ХИФУ доцена Снежана Слепцова тус бэйэтин 50.000 солк. сертификатын Өймөкөөн улууһун Төрүт нэһилиэгиттэн сылдьар Босиковтарга туттарда.
С. Петрова үлэлиир кафедратын сэбиэдиссэйэ бириис олох аҕыйах диэбитигэр, 25 тыһ. сертификат тута оҥорон аҕалан үөрдүбүтүн, аныгы таҥаска бэйэтин саҥа көрүүтүн киллэрбит Тааттаттан сылдьар Марианна Степановаҕа туттардыбыт. Кини тикпит таҥастара билиҥҥи кэмңэ олус сөптөөхтөр, хамаҕатык кэтиллэллэр.
Дьүүллүүр сүбэ үлэтин кэмигэр өрөспүүбүлүкэтээҕи Олоҥхо ассоцияциятын бэрэсидьиэнэ, ыһыаҕы сүрүн тэрийээччи Февронья Шишигина өссө 11 номинацияны эбии киллэрэн, 11 киһиэхэ 5.000 солк. суумалаах анал ааттар сертификаттарын үөрэ-көтө туттардыбыт.
Кылаан бириис хаһаайкатынан Тааттаттан Изабелла Элякова буолла, кини «Айан таҥаһын» кэлиэксийэтэ күрэх саамай үрдүк үрдэлин ылла. Иистэнньэҥ көрдөрүүтэ чаҕылхайынан уонна умнуллубут ичигэс айан таҥаһын сөргүтүүтүнэн, илиинэн имитии ньыматын күүскэ уонна сатабыллаахтык туттуутунан чорбойдо.
Дьүүллүүр сүбэ күрэх түмүгүнэн бэлиэтээһиннэрэ
Сылтан сыл аайы Олоҥхо Ыһыаҕын таҥас күрэҕэр кыттааччы элбээн иһиитэ уонна таҥастар хаачыстыбаларыгар балачча болҕомто ууруллубута көстөр. Онон бу күрэххэ элбэх бириис ирдэнэр. Манна тигээччилэр матырыйаалларын бэйэлэрэ атыылаһалларын, булуналларын, матырыйаал уонна түүлээх сыаналара олус үрдээбитин учуоттуохха. Аҕыйах ахсааннаах норуоттар, сахалар иискэ өбүгэ үгэһин тилиннэриигэ болҕомто уураллара көстөн эрэр.
Сорох улахан ааттаах маастардар сыл аайы наар биир таҥаһы эбэтэр кэлиэксийэни эргитэ сылдьан көрдөрөллөрө баар суол. СӨ норуот маастардара арыт-ардыгар боростуой иистэҥньэҥнээҕэр иистэрин таһыма мөлтөҕө эмиэ көстөр.
Дьиэ кэргэн уонна түмсүүнэн күрэххэ «таҥас кэлиэксийэтин» өйдөбүлэ ситэ киирэ илигэ бэлиэтэннэ. Дьон сакааһын ылан, тигэн киллэрии кэлиэксийэ көрүҥүн алдьатар, сыанабылын намтатар.
Хотугу да, сахалыы да таҥастарга үгэскэ кубулуйбут тигии ньыматын билигин да сыыһа-халты туттуу баар суол. Ардыгар үчұгэйдик таҥастаммыт сарыыны, түүлээҕи тигии ньымата боростуойа сыанатын эмиэ намтатыан сөп.
Түмүккэ, үгүс үйэлэргэ өбүгэлэрбит илдьэ сылдьыбыт, ол эрэн сайдыылаах олох тэтимигэр киирэн сүтэ быһыытыйбыт сахалар уонна хотугу аҕыйах ахсааннаах норуоттар иистэрин култуураларын сөргүтэн, салгыы сайыннаран иһиэҕиҥ диэн баҕа санаабытын тиэрдэбит.
Бу туһунан сиһилии “Хотугу сардаҥа” хаһыакка ааҕаарыҥ.
Светлана Петрова, дьүүллүүр сүбэ бэрэссэдээтэлэ, ХИФУ доцена; Айталина Решетникова, СӨ култууратын үтүөлээх үлэһитэ; Анастасия Куличкина, СӨ хотугу аҕыйах ахсааннаах норуоттар маастардарын түмсүүтүн салайааччыта