Үрүҥ халааттаах аанньалларбыт дьон-сэргэ доруобай туруктаах буоларын туһугар бары күүстэрин-уохтарын уураллар. Биир оннук киһинэн Сордоҥноох балыыһатыгар фельдшеринэн үлэлиир, нэһилиэк тутаах киһитэ Ирина Власьевна Ачикасова буолар.
Ирина Власьевна Дьокуускайдааҕы мэдэссиинэ училищетын 1986 сыллаахха бүтэриэҕиттэн Сордоҥноох нэһилиэгэр үлэлээбитэ номнуо 40-ча сыл буолла.
«Быраас идэтигэр саамай үөрүүлээҕэ диэн — ыарыһаҕыҥ үтүөрэрэ, ыарахан ыарыыны эрдэ сэрэтии, дьон-сэргэ эмчит сүбэтин ылынан уоскуйара, санаалара дьаарыстанара буоллаҕа, — диэн санаатын үллэстэр Ирина Власьевна. — Кэмигэр көмө оҥорон, киһи олоҕун быыһыыртан ордук суох. Мин санаабар, быраас киһи идэтин толору баһылаабыт буолуохтаах, кэмиттэн кэмигэр үрдэтинэн иһиэхтээх уонна, этэргэ дылы, дьиэ кэргэнин быраҕан, умнан да туран бэриниилээхтик үлэлиэхтээх. Маны таһынан эргиччи хас да соругу барытын тэҥинэн быһаараҕын. Холобур, инбэлииттэргин, ыарыһахтаргын көрөҕүн-истэҕин, суһал көмө оҥороҕун, диспансеризацияны, вакцинацияны ааһалларын хонтуруоллуугун, кырдьаҕастаргар дьиэлэригэр сылдьаҕын».
Ирина Власьевна Сордоҥноох нэһилиэгин биир актыыбынай позициялаах көхтөөх олохтооҕо буолар. Кэнсиэрдэр, биэчэрдэр кинитэ суох ааспаттар. Ыллыыр, үнкүүлүүр, сценкаларга оонньуур. «Кэскил» түөлбэ бастыҥ кыттааччыта, «Көмүлүөк» түмсүү тутаах чилиэнэ. Ирина Власьевна дьиэ кэргэн туллар тутааҕа, дурдата-хаххата. Түөрт оҕо күндү ийэтэ, биэс сиэн тапталлаах эбэтэ буолар. Иллэҥ бириэмэтигэр иистэнэрин, баайарын, ас астыырын сөбүлүүр. Ол быыһыгар тапталлаах сиэннэрин кытта бодьуустаһар.
Бу туһунан сиһилии “Хотугу сардаҥа” хаһыакка ааҕаарыҥ.
Ольга Скрыбыкина