Соторутааҕыта Дьокуускайга өрөспүүбүлүкэтээҕи Национальнай бибилэтиэкэ кыраайы үөрэтэр салаатын тэрийиитинэн Арассыыйаҕа Дьиэ кэргэн сылынан Маргарита Егоровна, Василий Степанович Винокуровтары кытары көрсүһүү буолла.
Винокуровтар өрөспүүбүлүкэҕэ түөрт хотугу улуустарга оҕо иитиитигэр, тыа хаһаайыстыбатын сайдыытыгар сөҕүмэр улахан кылааты киллэрбит ыал буолаллар. Дьокуускайга көһөн кэлэн баран, Маргарита Егоровна уонна Василий Степанович бэйэлэрэ үлэлээбит салааларынан научнай үлэни көмүскээн, Маргарита Егоровна педагогическай, онтон Василий Степанович тыа хаһаайыстыбатын билимин хандьыдааттара буолбуттара.
Бибилэтиэкэ үлэһиттэрэ бу дьиэ кэргэн суруйууларынан уонна кинигэлэринэн быыстапка оҥорбуттара дьон болҕомтотун тарта.
Маргарита Егоровна научнай үлэтин таһынан суруналыыс быһыытынан киэҥник биллэр. Кини күн бүгүнүгэр диэри икки тылынан суруйар улахан дьоҕурдаах суруналыыс. Василий Степанович саха сылгыта, ынаҕа племенной сайдыытыгар улахан кылааты киллэрбит учуонай уонна салайааччы. Бу дьиэ кэргэн үлэлээбит улуустарын кытары ситимнэрин быспаттар. Өймөкөөҥҥө ыытыллыбыт өрөспүүбүлүкэтээҕи Олоҥхо Ыһыаҕар үбүнэн-харчынан көмөлөспүттэрэ.
Үтүө илгэлээх дьиэ кэргэни СӨ үөрэҕин миниистирин солбуйааччы В. Захарова, тыа хаһаайыстыбатын миниистирин солбуйааччы П. Николаев, Ил Түмэн дьокутаата Е. Христофорова, Хотугулуу Илиҥҥи федеральнай университет президенэ Е. Михайлова, о.д.а. кэлэн эҕэрдэлээтилэр.
Ыал аҕа баһылыга В.С. Винокуров университекка үөрэх сайдыытыгар киллэрбит кылаатын, кэргэнэ Маргарита Егоровнаҕа айар үлэтигэр көмөтүн иһин Евгения Исаевнаҕа махтанна.
Үтүө ыалларбыт олохторо барыбытыгар холобур. Дьиэ кэргэн сылынан бастыҥ дьоммут этэҥҥэ олоруҥ!
Маргарита Егоровна бу дириҥ суолталаах тэрээһиҥҥэ кыттыыны ылбыт дьоҥҥо-сэргэҕэ махталын маннык тириэртэ:
— Өрөспүүбүлүкэ Национальнай бибилэтиэкэтигэр ыытыллыбыт дьаһалга кыттыбыт дьоммор-сэргэбэр дириҥник долгуйан туран биһиги дьиэ кэргэн аатыттан истиҥ махталбын тиэрдэбин. Биһиги Василий Степановичтыын олохпут устатын тухары үлэ үөһүгэр сылдьыбыт дьон кэнчээри ыччаппытыгар кэпсиирдээхпититтэн, көрдөрөрдөөхпүтүттэн үөрэн туран, кинилэргэ үтүө холобур буолуохпут диэн эрэнэбит. Бу тэрээһини тэрийбит, дьону-сэргэни түмпүт “Өймөкөөн” землячествотын салайааччытыгар Анна Атастыроваҕа, төһө даҕаны ыарытыйдар ырыаһыт үөлээннээхтэрин кытта кэлэн ыллам ырыаны бэлэхтээбит “Индигир” ансаамбылы салайар Тамара Северьяноваҕа махтал тылларын этэбин. Кинилэр мин “Өймөкөөн – Тымныы полюһа” диэн сөбүлээн истэр ырыабын бэлэх ууммуттарыгар олус үөрдүм. ХИФУ бэрэсидьиэнэ Евгения Михайлова тэрээһин саҕаланыаҕыттан түмүктэниэр диэри сылдьыбыта кэрэхсэбиллээх, бу буолар – кини биһигини ытыктыырын бэлиэтэ. Араас министиэристибэлэр, биэдэмэстибэлэр эппиэттээх үлэһиттэрэ күндү ыалдьытынан буолбуттара эмиэ биһигини үөрдэр.
Биир дойдулаахтарбыт, үөрэппит оҕолорбут бу истиҥ иэйиилээх тэрээһиҥҥэ кэлэн маанылаах ыалдьыт буолбуттарыгар муҥура суох махтанабыт, барыгытыгар этэҥҥэ буолууну, дьолу-соргуну баҕарабыт.
Марта Николаева