Тапталлаах оҕобут, убайбыт, бырааппыт Атласов Иван Иванович анал байыаннай дьайыыга сылдьан, бу дьыл сэтинньи 4 күнүгэр хорсуннук охтубутун туһунан курус иһитиннэрии кэлэн, ийэтин, аҕатын, бииргэ төрөөбүттэрин, кэргэнин, оҕолорун, чугас дьонун, нэһилиэк бары олохтоохторун аймаата.
Ваня сэтинньи 11 күнүгэр 1991 сыллаахха Төрүт нэһилиэгэр Наталья Николаевна уонна Иван Николаевич Атласовтар дьиэ кэргэттэригэр 11 оҕоттон 6-с оҕонон күн сирин көрбүтэ. Ваня олус аһыныгас, сырдык санаалаах, үлэһит оҕо буола улааппыта. Кини 1998-2009 сс. Төрүт орто оскуолатыгар ситиһиилээхтик үөрэнэн, ситии-хотуу аттестатын үөрэ-көтө туппута бу баарга дылы. Оскуолатааҕы үөрэммит сылларыгар Ваня тустуунан сөбүлээн дьарыктанара, онон улуустааҕы, өрөспүүбүлүкэтээҕи тустуу күрэхтэригэр кыттан, бириистээх миэстэлэргэ тиксэрэ. Түмэр, тэрийэр дьоҕурдааҕа, оскуола уонна нэһилиэкпит уопсастыбаннай олоҕор барытыгар көхтөөхтүк кыттара. Айылҕаҕа сылдьарын, бултуурун-алтыырын туохтааҕар да ордороро, булдуттан эдьиийдэригэр, аймахтарыгар куруук бэрсэн үөрдэрэ. 2010-2011сс. ытык иэһин толоро, Чита куоратыгар Безречная байыаннай чааска, танковай полкаҕа сулууспалаабыта. 2012 с. Дьокуускайдааҕы эргиэн-экэниэмикэ колледжыгар киирэн, менеджмент идэтин баһылаабыта.
2013 с. Ванябыт сирдээҕи аанньалын, тапталлааҕын Аннаны көрсөн, 2014 с. бэс ыйыгар сүрэхтэрин холбоон, ыал буолбуттара. Кини кэргэнин Анюта дойдутугар, Томпо улууһун Сайдыы нэһилиэгин, иккис дойду оҥостон олохсуйбута. Бу үөрүүлээх түгэнинэн эҕэрдэлээн, аҕата уонна бииргэ төрөөбүт убайдара, бырааттара Томпоҕо тиийэн, эдэр саҥа ыалга дьиэ тутталларыгар көмөлөспүттэрэ. Ваня кэргэннэнэн, Кира уонна Катя диэн икки кэрэчээн кыыс оҕолонон, дьоллоох ыал аҕатын аатын ылан, быр-бааччы олорбута. Кэргэнин, оҕолорун наһаа таптыыра, ытыһын үрдүгэр илдьэ сылдьара. Кини дьиэ кэргэнин Дьокуускай куоракка көһөрөн, бэйэтэ туспа, чааһынай дьиэ туттар улахан баҕа санаалааҕа.
Ваня Сайдыы нэһилиэгин дьаһалтатыгар землеустроитель дуоһунаһыгар үлэлээбитэ. Үлэтигэр эппиэтинэстээх, кыһамньылаах, холку майгылаах, эппит тылыгар турар, дьоҥҥо эйэҕэс сыһыаннаах буолан, олохтоохтор ытыктабылларын ылыан ылбыта, элбэх доҕоттордоммута. Ваня төрөөбүт Төрүтүн олус таптыыра, ахтара. Ол иһин дойдутугар сыл аайы кэлэрэ, хайаан да сынньанан, бултаан, балыктаан барара.
Хомойуох иһин, көһүппэтэх өттүбүтүттэн, үгүс дьон-аймах олоҕун-дьаһаҕын айгыраппыт алдьархайдаах сэрии аҥнаан кэлэн, оҕобут Ваня инникитин, ыра санааларын сарбыйда. Оҕобут баара-суоҕа 33 эрэ сыл бу орто дойдуга олорон ааста. Иэдээннээх сэрии илдьэ барабатаҕа буоллар, Ваня өссө да элбэх үтүөнү оҥоруо, тутуо-айыа этэ. Кини байыаннай бирисээгэтин толорон, дойдутун иллээх, эйэлээх сарсыҥҥытын туһугар эдэркээн олоҕун толук ууран, бу дьыл сэтинньи 4 күнүгэр Донецскай уобалас Волновахскай оройуонун Шахтерскай сэлиэнньэтин анныгар кырыктаах кыргыһыыга дьоруойдуу охтубута.
Ванябыт 2022 с. балаҕан ыйын 28 күнүгэр Томпо улууһуттан Ийэ дойдутун көмүскүүр мобилизацияҕа ыҥырыллыбыта. Кини анал байыаннай дьайыыга сылдьан, байыаннай салалта өтүттэн хайҕабылы, махталы элбэхтэ ылбыта. Өлөр өлүүттэн куттаммакка, эр киһилии дойдутун туһугар хорсуннук охсуспута, кэлэр олох кэскилин туһугар сэриилэһэбит диэн биир кытаанах, бигэ санаатыттан халбаҥнаабатаҕа. Кини өстөөхтөн чаҕыйбакка, хорсуннук сэриилэспитин «Эр санаа» уордьанынан икки төгүл наҕараадаламмыта туоһулуур.
Ваня көмүс уҥуоҕун сэтинньи 29 күнүгэр төрөөбүт Төрүтүн буоругар аҕалан кистээтибит. Бу ыарахан күннэрбитигэр, күндү киһибитин тиһэх суолугар атаарарбытыгар күүс-көмө, өйөбүл-тирэх буолбут аймах-билэ дьоммутугар уонна Төрүт дьаһалтатын үлэһиттэригэр ис сүрэхтэн махталбытын тиэрдэбит.
Оҕобут, убайбыт, бырааппыт, ыарахаттартан чугуйбатах хорсун саллаат, «Эр санаа» уордьан икки төгүллээх хабалыара, Төрүт чулуу уола Иван Атласов үтүө аата үйэлэргэ умнуллуо суоҕа, кини бу орто дойдуга ситэ олорботох олоҕун оҕолоро салҕыахтара, аҕаларын сырдык аатын ааттатыахтара.
Ийэтэ, аҕата, бииргэ төрөөбүттэрэ, аймахтара.