Соторутааҕыта Томтор модельнай бибилэтиэкэтин сэбиэдиссэйэ Амгира Спиридонова «Хоһоон хонуута» диэн ааттаах тэрээһиҥҥэ нэһилиэкпит хоһоонньуттарын түмэн, олус истиҥ көрсүһүүнү иилээн-саҕалаан ыытта.
«Уран тыл оһуора» диэн өрөспүүбүлүкэ араас улуустарыттан түмсүбүт литературнай түмсүү бөлөҕүн Раиса Тимофеева-Михайлова салайар үлэтин ситиһиилэриттэн Томтор айар куттааҕа Майя Винокурова киэҥник сырдатта.
Бу «Уран тыл оһуора» бөлөх тэриллиэҕиттэн Майя Винокурова-Ньургууна хоһооннорун куйаар ситиминэн араадьыйаҕа аахпытын элбэх дьон сэҥээрэ, киэн тутта истибит буолуохтаах. Ону тэҥэ хоһоонноро араас тиэмэлэринэн тиһигин быспакка бэчээккэ тахсаллар.
Тэрээһиҥҥэ Үчүгэй нэһилиэгиттэн Мария Винокурова кырачааннарга анаан суруйбут хоһооннорун оҕолор доргуччу ааҕан иһитиннэрдилэр.
Томтор нэһилиэгин «Айар түһүлгэ» литературнай түмсүүтүн салайааччыта Евдокия Готовцева уонна бу түмсүү чилиэннэрэ Таисия Харитонова, Степанида Иванова, Евдокия Попова көрсүһүүгэ санааларын сайа үллэһиннилэр.
РФ үтүөлээх учуутала, кыраайы үөрэтээччи, бары ытыктыыр истиҥ киһибит Мария Поликарповна Боярова санаатын эппитин тэрээһиҥҥэ мустубут дьон сэргии, кэрэхсии иһиттибит.
Ити курдук биир үтүө күн хомоҕой тыллардаах хоһоон тылларыгар уйдаран, бары дьиэбитигэр олус дуоһуйан тарҕастыбыт.
Бу туһунан сиһилии “Хотугу сардаҥа” хаһыакка ааҕыҥ.
Дария Тихомирова, биһиги общ. корр. Томтор