Улуус нэһилиэнньэтин эминэн-томунан хааччыйыыны тупсарар туһуттан улуустааҕы Киин балыыһа кылаабынай бырааһа Ирина Харлампьева хас нэһилиэнньэлээх пуун аайы аптека пууннарын арыйар дьаһал ылбыта.
Онон быйыл Аартык бөһүөлэгэр, Өймөкөөн, Үчүгэй, Төрүт уонна Сордоҥноох нэһилиэктэригэр аптечнай пууннар аһылыннылар. Нэһилиэктэргэ аптека аһыллыытын улуус дьоно-сэргэтэ туруорсубута уонна кэтэспитэ ыраатта. Бу — хас сыл аайы улуус уонна өрөспүүбүлүкэ ситэриилээх былааһын отчуотугар көтөҕүллэр сытыы боппуруос буолара. Дьон туруорсуута олоххо киирэн иһэрэ кэрэхсэбиллээх. Тыа сирин олохтоохторо үрдүттэн эми-тому атыылаһан, биир уустук кыһалҕалара быһаарылынна диэххэ сөп.
Төрүт нэһилиэгэр аптека быйыл от ыйыттан үлэлээн саҕалаата. Манна гирииби утары, сүрэх, сүһүөх эмтэрин курдук наадалаах препараттар атыыланаллар. Олохтоохтор быраас анааабыт уонна наадыйар эмтэрин үрдүттэн ылар буоллулар. — ОРВИ эҥин тохтоон турар кэмигэр атыылаһааччы аҕыйах, оттон дьаҥ-дьаһах өрө турдаҕына эми-тому ботуччу ылыахтара, – диэн эмчит Анфиса Кривошапкина иһитиннэрдэ.
Соторутааҕыта Төрүккэ улуус салалтата уонна тэрилтэлэр салайааччылара тиийэ сырыттахтарына олохтоохтор улуустааҕы Киин балыыһа кылаабынай бырааһыгар Ираида Харлампьеваҕа тыа сирдэригэр аптеканы астаран үлэҕэ киллэрбиттэригэр махтаммыттара.
Сордоҥноох аптечнай пуунугар фельдшер идэлээх Зоя Вензель быстах кэмҥэ үлэлиир. Манна аптека атырдьах ыйыгар аһыллыбыт. Киһи наадыйар эмэ-томо барыта баар. Эмтэринэн оройуоннааҕы киин балыыһа хааччыйар. Дьаҥ-дьаһах салҕанар түбэлтэтигэр, эми-тому эбии ылыыга үлэ ыытыллар.
Оттон Томторго аптечный пуун 2021 с. дьыл алтынньы 18 күнүттэн ыла үлэлиир. Томтор учаастактааҕы балыыһатын педиатр бырааһа Индилена Местникова иһитиннэрбитинэн, аптека биир үлэһиттээх. – Эминэн хааччыллыыга судаарыстыба өттүттэн көмө суох, бэйэм күүспүнэн хааччыйабын, — диир кини. – Чуолаан, аҕам саастаах, сырыыны-айаны кыайбат уонна хроническай ыарыылаах дьону хааччыйыыга болҕомто уурабыт. Эмтэрбит Дьокуускай, Новосибирскай, Хабаровскай хайысханан айаннаан кэлэллэр.
Манна даҕатан эттэххэ, Томтор нэһилиэгэр икки аптека баар. Биирдэстэрэ – урбаанньыт Клавдия Скрыбыкина аптеката.
— Томторго 2012 с. аптеканы арыйарым саҕана эминэн хааччыллыы быстар мөлтөх этэ. Ол иһин кэргэммин Иннокентий Дмитриевиһы кытта аптечный пуун арыйарга быһаарыммыппыт. Билигин Дьокуускайтан массыынанан сырыы баар буолан, нэһилиэккэ эми тиэрдии быдан түргэтээтэ, дьон сакааһын толоробун, наадыйар препараттарын сакаастаан ылабын. Сыана күн-түүн үрдүү турара биллэр, ол да буоллар мин медикаменнар сыаналарын наһаа ыараппат туһугар кыһаллабын.
Эмчиттэр анал кэбиниэттэргэ кассовай аппарааттары туһанан, нэһилиэнньэҕэ эмп атыылыыллар. Медикаменнары миэстэтигэр тустаах испииһэгинэн сакаастаан ылыы, нэһилиэнньэҕэ табыгастаах. Маннык аптека Өймөкөөн нэһилиэгин врачебнай амбулаториятыгар эмиэ балаҕан ыйыттан аһыллан үлэлиир.
Улуустааҕы Киин балыыһа салалтата модернизация биэс сыллаах былаан-графигын быһыытынан тэрилтэ материальнай-тиэхинньиичэскэй базатын тупсарыыга былааннаахтык үлэлэһэр. Улуус мэдиссиинэ тэрилтэтэ биир сиргэ турбат, былааннаахтык сайдар.
Евдокия Егорова