2024 сыл Арассыыйаҕа Дьиэ кэргэн сылын бэлиэтинэн ааһан эрэр. Соторутааҕыта биһиги кэрэспэдиэммит үлэни өрө туппут ураты дьарыктаах элбэх оҕолоох ийэни кытта көрсөн кэпсэттэ.
Биһиги улууспутугар талааннаах асчыт, кондитер дьон элбэхтэр. Олортон биирдэстэрэ – билигин Аартык бөһүөлэгин олохтооҕо, сахалыы сибэкки курдук ааттаах, минньигэс, кэрэ көстүүлээх астарынан дьону өрүү сөхтөрөр Сардаана Винокурова. Кини астаабыт минньигэс туортара, трайфллара, кекстэрэ элбэх ыал бырааһынньыктааҕы остуолун бастыҥ аһа, киэргэлэ буолаллар.
Сардаана Яковлевна Өймөкөөн сэлиэнньэтигэр төрөөн-улаатан, оскуоланы туйгун сыананан бүтэрбитэ. Оҕо сааһын олус сылаастык, истиҥник санаан ааһар. Кини соҕотох аҕа Яков Павлович Саввин кыыһа.
— Аҕам бастаан кооперативнай техникуму бүтэрбитэ, онтон үрдүк үөрэххэ киирэн, ревизор-буҕаалтыр идэтин Ленинградка баһылаабыта. Кини үлэ уонна тыыл бэтэрээнэ, саахымакка успуорт маастыгар кандидат. Уопсайынан, кини успуорт өттүгэр элбэх ситиһиилээх этэ, — диэн мичээрдээн ылар Сардаана.
Билигин Сардаана Яковлевна — биэс оҕолоох ийэ, икки игирэ сиэннээх эбэ. Кини дьоҕус кондитерскай тэринэн, Аартык, Уус-Ньара олохтоохторун күн минньигэс астарынан күндүлүү олорор.
Итини таһынан Сардаана өссө иистэнэр, бөһүөлэгин дьонун таҥастарын-саптарын иискэ сакааска ылар. Кини сахалыы таҥастары тигэн, элбэхтэ ыһыах түһүлгэтин дьонун-сэргэтин харахтарын сымнаппыта, араас күрэхтэргэ кыттан бочуоттаах миэстэлэри баччааҥҥа дылы ылаттыыр.
— Мин санаабар, хас биирдии ыал ийэтэ — саха дьахтара — иистэниэхтээх, ас астыахтаах. Ол дьоҕурбун сайыннаран, мин билигин сөбүлүүр идэлэрбинэн дьарыктана сылдьарбынан дьоллоохпун, — диэн үллэстэр элбэх оҕолонуу муҥутуур дьолун билбит улахан дьиэ хаһаайката Сардаана Яковлевна.
Бу туһунан сиһилии «Хотугу сардаҥа» хаһыакка ааҕаарыҥ.
Мария ГЕРМОГЕНОВА