Кулун тутар 16 күнүгэр айар тыл аҕата, саха уус-уран литэрэтиирэтин төрүттээччилэриттэн биирдэстэрэ, суруйааччы, бэйиэт, бөлүһүөк, уопсастыбаннай дьайыксыт Алексей Елисеевич Кулаковскай-Өксөкүлээх Өлөксөйгө аналлаах Саха Сирин үрдүнэн ‘’Өксөкүлээх сардаҥата’’ диэн биэс сыллааҕы аахсыйа киэҥ хабааннаахтык ыытылынна.
Бу дьаһал Ил Дархан ыйааҕынан 2022 сыллаахха ыам ыйын 25 күнүгэр анаан ылыллыбыта уонна 2023-2027 сс. устата салҕанан барар.
Чүмэчи уота Алексей Елисеевич олорон ааспыт кэмин кэрэһилиир. Имик-самык чүмэчи уота им балайга элбэх сырдыгы аҕалбат эрээри, сырдыкка эрэли үөскэтэр. Өксөкүлээх Өлөксөй сахпыт сырдыга саха норуотугар сайдар-үүнэр саҕахтары арыйар. Хас биирдии көлүөнэ үүнэр-сайдар тосхолун, ыарахаттары туораан, бэйэтэ тобулуохтаах, диэн ис хоһоонноох.
Өймөкөөн оройуонун бибилэтиэкэлэрэ бу аахсыйаҕа көхтөөх кыттыыны ыллылар. Хас биирдии нэһилиэккэ тыыннаах чүмэчи уотун уматан, улуу киһибитин санаан, ахтан аастылар. Бу күн Алексей Елисеевич Кулаковскай-Өксөкүлээх Өлөксөй «Ырыа-хоһоон” диэн хомуурунньуга тахсыытын 100 сыллаах үбүлүөйүгэр анаан хоһооннору аахтылар. Литературнай аахсыйаҕа тыа сирин интеллигенцията – учууталлар, олохтоох салайыныы уонна култуура үлэһиттэрэ кытыннылар.
Мария Максимова, улуустааҕы Култуура управлениетын начаалынньыгын солбуйааччы