Өймөкөөнтөн – Улуу Новгородка

Бу дьыл сэтинньи 9 күнүттэн сэтинньи 12  күнүгэр диэри  Арассыыйа биир киэҥ устуоруйалаах кырдьаҕас куоратыгар Нижнэй Новгородка норуоттар икки ардыларынааҕы “Кыайыы волонтердарын” форума ыытыллыбыта.

Манна кыттарга 1500-н тахса сайаапка киирбититтэн 89 эрэгийиэнтэн 200 киһи, ол иһигэр Саха сириттэн Өймөкөөн икки ыччата улахан  куонкуруһу ситиһиилээхтик  ааспыттара.

Бу сүдү суолталаах тэрээһиҥҥэ Н.М. Заболоцкай-Чысхаан аатынан Томтор орто оскуолатын выпускнига, М.К. Аммосов аатынан ХИФУ историческай факультетын иккис куурсун устудьуона, «Кыайыы волонтердара» Бүтүн Арассыыйатааҕы общественнай хамсааhын Саха сиринээҕи салаатын толорооччу дириэктэрэ Тимур Егоров уонна Н.О. Кривошапкин аатынан Өймөкөөн орто оскуолатын бүтэрбит Саха сирин оскуолаларын үөрэнээччилэрин этэрээттэрин салайааччыта, Дьокуускай куорат Л.А. Колосова аатынан 33 №-дээх орто оскуолатын сүбэһитэ, устуоруйа уонна обществознание учуутала Анисья Винокурова кыттар чиэстэммиттэрэ.

Форум аһыллыытыгар Нижнэй Новгородтааҕы уобалас губернатора Глеб Никитин,  сенатор Александр Вайнберг кыттыыны ыллылар. Тэрээһин үрдүк таһымнаахтык ыытылларын уобалас  “Кыайыы волонтердара” хамсааһынын салайааччыта Мария Самоделкина сүрүннээтэ.

Форум кыттыылаахтарыгар анаан үөрэхтээһин араас бырагыраамалара, интэриэһинэй көрсүһүүлэр, кэпсэтиилэр, Нижнэй Новгород куорат устун экскурсия тэрилиннилэр.

Тэрээһин чэрчитинэн былаһааккаларга дойдуга буола турар билиҥҥи балаһыанньа тула тустаах кэпсэтиилэр, патриоттуу өйгө-санааҕа сыһыаннаах санааны этиниилэр, анал байыаннай дьайыыга сылдьар байыастары күүстээхтик өйүүр үлэ өссө да ыытылла турарыгар бары түмсүүлээхпитин бэлиэтиир, инникигэ сайдыыны торумнуур үгүс күттүөннээх кэпсэтии таҕыста.

Манна даҕатан эттэххэ, Анисья Винокурова  маннык таһымнаах форумнарга үһүс төгүлүн кыттыыны ылар. Бастаан 2022 с. Москубаҕа Кыһыл болуоссакка Улуу Кыайыы парадын тэрээһинигэр кыттыбыта, “Бессмертный полк” хаамсыытын арыалласпыта. Онтон ааспыт сылга Волгоград куоракка Сталинградтааҕы кыргыһыы 80 сылыгар аналлаах форумҥа кыттан волонтердаабыта. Кини ол хааннаах кыргыһыыга дьоруойдуу өлбүт эһэтэ И.И. Павлов көмүс унуоҕар сибэкки дьөрбөтүн уурбута. Анисья «Кыайыы волонтердара» Бүтүн Арассыыйатааҕы общественнай хамсааhын ыытар үлэтигэр киллэрбит кылаатын иһин толорооччу дириэктэр Анастасия Рябова аатыттан Махтал сурук туппута улахан суолталаах.

Норуоттар икки ардыларынааҕы “Кыайыы волонтердарын” форумугар баҕа өттүлэринэн Иордания, Египет, Соҕуруу Корея, Узбекистан, Казахстан, Индия, Приднестровье, Молдова о.д.а. дойдулартан кыттыбыттара кинилэр Арассыыйаны сыаналыылларын уонна Аҕа дойду Улуу сэриитигэр кыайыыны ситиспит норуоту үрдүктүк туталларын туоһутунан буолар. Маннык тэрээһиннэр дойдубутунан киэн туттууну саҕаллар, араас тыллаах, итэҕэллээх дьону сомоҕолуур, түмэр күүстээхтэр.

Биһиги оҕолорбут Тимур Егоров уонна Анисья Винокурова ситиһиилэринэн киэн туттабыт, инникитин даҕаны төрөөбүт дойдуларын ааттата турдуннар, үлэлэригэр, үөрэхтэригэр өссө үрдүк көрдөрүүлэри баҕарабыт!

Агафья ГОТОВЦЕВА, биһиги общ.корр., бибилэтиэкэр-педагог, Өймөкөөн