Иитээччи идэлээх Марина Романова Өймөкөөн нэһилиэгэр Слепцовтар иллээх дьиэ кэргэннэригэр тапталлаах бэһис оҕонон күн сирин көрбүтэ.
Төрөппүттэрэ Марина Афанасьевна уонна Гаврил Иванович туох да үлэттэн толлон-чаҕыйан турбат туруу үлэһит дьон этилэрэ. Дэлэҕэ даҕаны аҕаларын Гаврил Ивановиһы айар куттаах биир дойдулаахпыт Прокопий Ксенофонтов хоһоонугар хоһуйуо дуо.
Оҕо сааһыгар кырачаан кыысчаан Марина куукулаларын дьыбааҥҥа олордон баран учуутал буола оонньоон, үөрэтэр этэ. Оччолорго кини бу идэни үйэ-саас тухары талан, умсугуйан туран үлэлиэм дии санаабатах буолуохтаах.
Марина бастакы кылааска сиэтэн киллэрбит учууталын О.С. Сивцеваны өрүү махтана ахтар. Октябрина Семеновна оскуола боруогун аан бастаан атыллаан киирэр оҕолорго билиигэ-көрүүгэ тардыһыыны иҥэрбит, элбэх үтүө сатабылларга үөрэппит киһилэрэ буолар.
Марина С.Ф. Гоголев аатын сүгэр педагогическай колледжка оскуолаҕа киирэ илик саастаах оҕолор уһуйааннарын иитээччитин идэтигэр үөрэммитэ. Кини билигин 11-с сылын Дьокуускайга Сайсаар уокуругар “Мозаика” уһуйааҥҥа таһаарыылаахтык үлэлии-хамсыы сылдьар.
Марина Гаврильевна былырыын Саха сиригэр биллэриллибит Уһуйааччы сылыгар үлэтигэр бастыҥ көрдөрүүлэрин иһин “Сайсаар эрэлэ” диэн номинацияҕа тиксэн, дипломунан уонна харчынан наҕараадаламмыта. Кини иитэр-үөрэтэр оҕолоро араас таһымнаах күрэхтэргэ куруутун кыттан сайдан, саҥаны билэ-иҥэринэ сылдьалларыгар ис сүрэҕиттэн кыһаллар, дууһатын уурар.
Маринаны кыра эрдэҕиттэн билэр үөрэппит оҕом буолан, кини ситиһиилэриттэн олус үөрэбин, киэн туттабын.
Сиһилии “Хотугу сардаҥа” хаһыакка ааҕыҥ.
Тамара Винокурова, биһиги общ.корр.