“Өймөкөөн улууһа” МТ тэриллии дьаһалтатын баһылыга Иван Максимов уонна сэлиэнньэлэр баһылыктара Павел Васильев (Өймөкөөн), Владимир Алексеев (Төрүт) анал байыаннай дьайыы чаастарыгар бара сырыттылар. Кинилэр айаннарын сүрүн сыалынан-соругунан Саҥа дьылы көрсө Өймөкөөн улууһуттан сулууспалыы сылдьар байыастарга гуманитарнай көмөнү оҥоруу буолар.
Улуус баһылыга Иван Максимов эрдэ бэлиэтээбитин курдук, Өймөкөөн улууһун дьоно-сэргэтэ хомуйбут гуманитарнай көмөлөрө биир үксүн аадырыстаах дьоҥҥо тиийбэт эбит. Онон баһылыктар Тымныы полюһун байыастарыгар көмөнү тус бэйэлэрэ тиэрдэн биэрэр быһаарыы ылыммыттара.
Биһиги улууспут дэлэгээссийэтэ СВО зонатыгар тиийэн уолаттары кытта истиҥник көрүстэ уонна кинилэргэ квадроцикл, квадрокоптер, массыына прицебын, автомакка аналлаах тэрил (үс устуука), тепловизордары, электрогенератордары, ичигэс таҥаһы-сабы, ас-үөл набордарын, эмп-том о.д.а. наадалаах малы-салы тиксэрдэ.
И.Е. Максимов эрэдээксийэҕэ иһитиннэрбитинэн, бу күннэргэ Дьааҥы, Горнай, Чурапчы уонна Аллараа Халыма улуустарын бэрэстэбиитэллэрэ эмиэ СВО-ҕа тиийэн биир дойдулаахтарын көрүстүлэр.
Өймөкөөннөр биэс күн устата эрдэ ылыныллыбыт маршрутунан Өймөкөөнтөн тиийэн Аҕа дойдуларын көмүскүү сылдьар байыастары байыаннай чаастарга сылдьан көрүстүлэр, кэпсэттилэр.
Гуманитарнай көмөнү оҥорууга улуус дэлэгээссийэтэ Өймөкөөн оройуонунааҕы СВО кыттыылахтарыгар көмөлөһөр Пуонда анал счетуттан үбү туһанна. Ону сэргэ “Өймөкөөн” НКО чилиэннэрэ, биир дойдулаахтар түмсүүлэрин актыыба уонна Төрүт нэһилиэгин олохтоохторо хомуйбут баһыылкаларын илдьэн тиксэрдилэр.
Өймөкөөн оройуонун дьаһалтата анал байыаннай дьайыыга сылдьар уолаттарга көмөлөһөр аһымал санаалаах улуус олохтоохторугар барыларыгар барҕа махталын тириэрдэр.
Биһиги корр.