Анал байыаннай дьайыыга сылдьар буойуттары Саха сирин дьоно-сэргэтэ бука бары өйүүллэр, төһө кыалларынан көмөлөһөллөр. Бу туһунан бары да даҕаны бэчээттэн, сибээс ситимнэриттэн билэ, көрө-истэ олоробут.
Соторутааҕыта Өймөкөөн улууһун Томтордооҕу участковай балыыһатын кэлэктиибэ (сал. Уруйдаана Протопопова) “Якутия с тобой!” диэн бүтүн өрөспүүбүлүкэтээҕи хамсааһын “Своих не бросаем” диэн аахсыйатыгар актыыбынайдык кытынна.
Ол курдук тэрилтэ хас биирдии үлэһитэ харчынан кыттыста, бэйэтин илиитин сылааһын, алгыһын иҥэрэн, сахалыы тыыннаах харысхаллары оҥордо, саллааттарга анаммыт истиҥ-иһирэх тыллаах суруктары суруйда.
Хомуллубут харчынан наадалаах сылаас таҥаһы-сабы удамыр сыанаҕа буларга улахан көмөнү оҥорбут Надежда Кондаковаҕа кэлэктиип махталын биллэрэр.
25 устуука бэлэмнэммит баһыылканы Томтортон төрүттээх Дьокуускай олохтооҕо Надежда Иванова Дьокуускайга Орджоникидзе уул., 10 нүөмэрдээх дьиэтигэр – СВО өрөспүүбүлүкэтээҕи ыстаабыгар — тиийэн туттарда.
Кылаабынай быраас Уруйдаана Протопопова уонна балыыһа үлэһиттэрэ санааларын маннык үллэстэллэр:
— Анал байыаннай дьайыы буола турар сиригэр икки өттүттэн өлүү-сүтүү тахса турара олус хомолтолоох. Ханнык баҕарар ийэ бэйэтин оҕотун өлүүгэ анаан төрөппөтөҕө чуолкай. Бу билиҥҥи тыҥаан турар балаһыанньа Арассыыйа кыайыытынан, аан дойдуга ил-эйэ олохтонуутунан түмүктэниэн бары олус диэн баҕарабыт.
Биһиги оҥорбут алгыстаах харысхалларбыт уолаттарбытын арчылыы, араҥаччылыы сылдьыахтара, кинилэргэ күүһү-күдэҕи, булгуруйбат модун санааны иҥэриэхтэрэ диэн эрэллээхпит. Ыччаттарбыт бары этэҥҥэ дойдуларыгар төннөн кэлэллэрин туһугар үрдүкү айыылартан көрдөһөбүт.
Улууспут дьоно-сэргэтэ эмиэ бу уустук кэмҥэ туора турбакка, көмө-өйөбүл буолан, кыайыыны уһанса сылдьара өрүү махталынан ахтыллыаҕа.
Сиһилии “Хотугу сардаҥа” хаһыакка ааҕыҥ.
Тамара Винокурова, биһиги общ.корр.