Өймөкөөннөр Бүтүн Арассыыйатааҕы «Нация кроһа» тэрээһиҥҥэ кытыннылар

Соторутааҕыта Өймөкөөн нэһилиэгэр үтүө үгэскэ кубулуйбут «Нация кроһа» тэрээһин буолан ааста. Сүүрүүгэ Өймөкөөн орто оскуолатын үөрэнээччилэрэ уонна нэһилиэк олохтоохторо кытыннылар.

Санатар буоллахха, бу Бүтүн Арассыыйатааҕы “Успуорт – олох нуормата” федеральнай бырайыак уонна “Демография” национальнай бырайыак чэрчитинэн тэриллэр дьаһал.

Сүүрүү ыытыллар күнүгэр биһиэхэ сарсыардаттан хаар-тыал аргыстаах күн буолла. Ону ол диэбэккэ, оҕолор оскуолаҕа муһуннубут. Маршруту физическэй култуура учуутала Ольга Борисова билиһиннэрдэ. Ол быһыытынан сүүрүүнү оскуола тэлгэһэтиттэн саҕалаан, бөһүөлэги биир гына эргийэн, оскуола таһыгар фиништиэхтээх этибит. Улахан кылаас оҕолоругар 3 км сүүрэр сорук турбута. Оттон кыраларга маршруттара мантан кылгас.

Тымныыны тымныы диэбэккэ сүүрүүгэ кыттыбыт хоһуун сүүрүктэрбитигэр кытаанах доруобуйаны, уҕараабат эрчими, үрдүк ситиһиилэри баҕарабын.

Давид Канаев, 9-с кылаас, Өймөкөөн

Читайте дальше