Улууска быйылгы оттооһун хампаанньатыгар тыа хаһаайыстыбатын бородууксуйатын оҥорон таһаарааччылар уопсай былааннара 3700 тоннаҕа тэҥнэһэр.
Ол курдук сорудах быһыытынан улуус кэтэх хаһаайыстыбалаахтарын былааннара 1854 тонна. Оттон бааһынай хаһаайыстыбалар 1138 тн оту бэлэмниир былааннаахтар. Тэрээһиннээх хаһаайыстыбалар 448 тоннаны бэлэмниэхтэрэ. Нэһилиэк ахсын тэриллэр мобильнай биригээдэлэрэ 260 тонна оту чөкөтүөхтэрэ.
Нэһилиэктэринэн ыллахха, 2-с Бороҕоҥҥо түөрт тэрээһиннээх хаһаайыстыба баар. Ол – “Өймөкөөн” ХЭТ, “Тонор” уонна “Силис-Полюс холода” тыа хаһаайыстыбатын кэпэрэтииптэрэ, “Мола” аҕа ууһунан община. Кинилэр тустааҕынан 145, 160, 100 уонна 15 тонна оту бэлэмниир сорудахтаахтар.
Бу нэһилиэккэ 7 бааһынай хаһаайыстыбата холбоон 222 тонна оту бэлэмниэҕэ. Оттон кэтэх хаһаайыстыбалаах дьон былааннара – 508 тонна. Манна тэриллэр мобильнай биригээдэ отчуттара сайын устата 100 тоннаны оттуурга соруналлар.
“Өймөкөөн Тымныы Оройо” МТ биэс бааһынай хаһаайыстыбатын былаана холбоон 255 тоннаҕа тэҥнэстэ. Чааһынай дьон бу сайын 508 тоннаны оттоон кыстыкка хаһааныахтаахтар.
Төрүт нэһилиэгэр бааһынайдар 85 тонна былааннаахтар. Бу нэһилиэк кэтэх хаһаайыстыбалаахтарыттан 17 оттуур звенонан 32 отчут ходуһаҕа тахсан, 235 тонна кэбиһиини туруорар соруктаах. Оттон 4 киһилээх биир мобильнай биригээдэ быйылгы сыллааҕы сорудаҕа – 20 тонна.
Үчүгэй нэһилиэгэр тэрээһиннээх хаһаайыстыбалартан “Үчүгэй” ААУо уонна “Гиркун” аҕа ууһунан община окко биирдии звеноны таһаарыахтара. Былааннара тустааҕынан 23 уонна 5 тонна. Түөрт бааһынай хаһаайыстыба былаана – 228 тн. Оттон 14 моой отчуттар холбоон 99 тонна оту кэбиһэн кэчигирэтиэхтэрэ.
Сордоҥнооххо тэрээһиннээх хаһаайыстыба суох. Ол оннугар манна 8 бааһынай хаһаайыстыба бу күннэргэ ходуһаҕа тахсаары ох курдук оҥостор. Кинилэр оттооһуҥҥа уопсай былааннара – 318 тонна. Бу нэһилиэккэ оттуу тахсар чааһынай дьон уопсай ахсаана 55 киһиэхэ тэҥнэһэр, кинилэр 252 тонна оту хаһааныахтара. Мобильнай биригээдэҕэ икки киһи оттоон, 20 тонна оту бэлэмниирэ күүтүллэр.
Уус-Ньараҕа соҕотох урбаанньыт “Стенин И.Ю.” сайыҥҥы үтүө кэми туһанан 30 тн оту бэлэмниэҕэ.
Бу ыйыллыбыт хаһаайыстыбалары барыларын холбоотоххо, бу сайын ходуһаларга уопсайа 573 отчут тахсара былааннанар.
Улуустааҕы Тыа хаһаайыстыбатын управлениетын начаалынньыга Руслан Атласов этэринэн, Өймөкөөн улууһугар от үүнүүтэ ааспыт сыллааҕар үчүгэй. Онон тыа хаһаайыстыбатын бородууксуйатын оҥорон таһаарааччылар кыстыыр оту булунуохпут диэн эрэх-турах сананаллар. Тыа сиригэр бу күннэргэ күүстээх ардах түһэн, сорох сиринэн уу таһааран, олохтоохтор от үлэтин өссө саҕалыы иликтэр.
Любовь Кривошапкина