Дьокуускай куоракка Өймөкөөн улууһун землячествотын иһинэн бэйэбит баҕа өттүбүтүнэн “Анал байыаннай дьайыы кыттыылаахтарыгар көмө” ыстаабын тэрийэн күүспүт тиийэринэн үлэлии-хамсыы сылдьабыт.
Үлэбит сүрүн сыала — анал байыаннай дьайыыга кытта сылдьар оҕолорбутугар, уолаттарбытыгар көмөлөһүү диэн буолбута.
Уопсай сүбэнэн куорат иһигэр уонна бэйэбит улууспутугар көмө харчыны хомуйарга этии киллэрбиппит. Ону буола турар уустук балаһыанньаны өйдөөн, көрдөһүүбүтүн ылынан, ыстаапка эрэнэн, үгүс киһи харчы ыытта.
Кинилэр ааттарын улуус хаһыатыгар сырдатары наадалааҕынан аахтыбыт: В.М. Ксенофонтова, Л.С. Иванова, Ф.А. Румянцева, Т.П. Винокурова, П.Е. Кондакова, Э.Н. Карпова, С.Т. Неустроева, В.Н. Прокопьева, М.А. Кондакова, С.Д. Атастырова, М.В. Максимова, А.Н. Атастырова, Е.Н. Габышева.
Н.О. Кривошапкин аатынан Өймөкөөн орто оскуолатын кэлэктиибин аатыттан алын сүһүөх учуутала, баай Кырбаһааҥкын сыдьаана Т.И. Луковцева, Төрүт нэһилиэгин баһылыгын солбуйааччыта А.Г. Кондаков нэһилиэгин дьонун аатыттан, Төрүт нэһилиэгин оҕо уһуйаанын кэлэктиибэ харчы хомуйдулар.
Өймөкөөн биир убаастанар ыала Ирина Федоровна, Егор Иванович Сивцевтар:
«Өймөкөөн боотура!
Дойдуҥ ото сырдык
санаа илдьитин тириэртин!
Көмүскэс санаа
күүһүн илтин!
Суолуҥ ыраас,
Күнүҥ сылаас буоллун!», —
диэн алгыс тыллардаах кучу чэйи, үөрэ отун (5 хоруопканы) ыыттылар.
Өймөкөөнтөн төрүттээх Нам олохтооҕо А.П. Ксенофонтова бэйэтэ тылланан, «Оймяконцы с тобой!” диэн суруктаах, 3 араас өҥнөөх 100 устуука харысхал-бирканы оҥорон биһиэхэ тиксэрдэ. Бу санааны көтөҕөр суолталаах суруктаах биркалар таҥаска-сапка тигиллиэхтэрэ.
Билиҥҥи уустук кэмҥэ кимиэхэ баҕарар түбүк, араас кыһалҕа, ороскуот аҕыйаҕа суох. Ону аахсыбакка, биһиэхэ эрэнэн, биир дойдулаахтарбытыгар материальнай көмө ыытан, амарах сүрэххит сылааһын, истиҥ-иһирэх сыһыаҥҥытын холбоон, улахан өйөбүл буоллугут. Норуот күүһэ — көмүөл күүһэ!
Маны сэргэ Өймөкөөн улууһун нэһилиэктэригэр, бөһүөлэктэригэр араас аһымал аахсыйалара тиһигин быспакка бараллар.
СВО ыстааба Евгения Габышеваҕа, Мария Максимоваҕа күүстээх үлэни ыыппыттарыгар, ханнык даҕаны тэрээһиҥҥэ өрүү көхтөөхтүк кыттар, күүс-көмө буолар Фаина Румянцеваҕа уонна Тамара Винокуроваҕа дириҥ махталын тириэрдэр.
Бу туһунан сиһилии “Хотугу сардаҥа” хаһыакка ааҕаарыҥ.
Анна Атастырова, землячество салайааччыта, Дьокуускай