Кэнники кэмҥэ Саха сирин бары улуустарыгар дьиэ араас кыылын иитэн, көтөр сымыыттарын инкубаторга таһааран нэһилиэнньэҕэ атыылыыр тэттик хаһаайыстыбалар үксээтилэр. Хоту да улууска түргэнник ситэр салааны сайыннарыахха сөп, диэн Өймөкөөн улууһун Үчүгэй нэһилиэгин олохтооҕо Светлана Казарина бигэргэтэр.
Кэтэх хаһаайыстыбаны тэринии бастакы олуктара
Ол курдук элбэх оҕолоох эдэр ийэ Светлана Казарина сибиинньэлэри иитэн, дьиэ кэргэнин бэйэ аһынан хамаҕатык хааччыйарга соруммута. Кини быйыл саас Хатастааҕы сибиинньэ комплексатыттан үс сибиинньэ оҕотун ылан хаһаайыстыбатын хаҥаттыбыта.
«Хаһаайыстыба тэринэрбэр нэһилиэнньэ социальнай көмүскэллээх буолуутун бырагыраамата төһүү күүс буолбута. Бу социальнай хантараак туһунан олохтоох дьаһалта исписэлииһэ Аграфена Аммосоваттан истибитим. Олус сэргээбитим. Кини бу бырагыраамаҕа киирсибэккин дуо, диэн этии киллэрбитигэр, тута сөбүлэспитим», — диэн Светлана Юрьевна сэһэргиир.
Кини муус устар ыйга социальнай дуогабар түһэрсэн, былаанын көмүскээн, бэйэ хаһаайыстыбатын тэриммитэ. Ол курдук Хатастан 10 ыйдаахтар 3 сибиинньэ оҕолотун сакаастаан аҕалтарбыт. Билигин Светлана хаһаа йыстыбатыгар 2 тыһы уонна биир атыыр сибиинньэ баар. Хаһаайка дьиэ кыылларын аһылыгын Дьокуускай куораттан сакаастаан ылар. Биир сибиинньэ сылга биирдэ-иккитэ төрүүр-ууһуур, ортотунан 8-10 чооскулаах буолан, хаһаайыстыба түргэнник хаҥыыр кыахтаах.
Светлана бу хаһаайыстыбатын удьуор үлэһит үгэһин салҕыыр, төрүт дьарыгы өссө сайыннарар, тэнитэр сооруктаах тэриммитэ. Кини аҕата Юрий Викторович Казарин үйэтин сааһын тухары хороҕор муостааҕы уонна сибиинньэлэри иитиинэн дьарыктаммыта.
Билигин дьиэ кыылын көрүүтүгэр Светлана оҕолоро: 6-лаах Сулустаан, 4-тээх Эрхаан, бэл, 3-тээх Кристан — эмиэ кыттыһаллар. Кинилэр үөрэхтэрин, дьарыктарын кэннэ ийэлэригэр көмөлөһө сүүрэллэр, үөрүйэхтик туттан, кыылларын көрөллөр-харайаллар. Нэһилиэк олохтоохторо эдэр ийэ оҕолорун кыра саастарыттан үлэ үөрүйэхтэригэр уһуйарын олус сэргии көрөллөр.
«Дьиэ кыыллын иитэргэ, биллэн турар, үчүгэй тутуу наада. Ол иһин эргэ хотону чөлүгэр түһэриигэ эмиэ социальнай хантараак баттаспытым. Уопсайа 370 тыһыынча сууммалаах көмө харчы көрүллүбүтэ», — диэн сатабыллаах хаһаайка кэпсиир.
Кини инники өттүгэр ынах сүөһүнү, кууруссаны ииттэн, хаһаайыстыбатын тэнитэр баҕалаах. Итини таһынан тыа хаһаайыстыбатын быыстапкаларыгар, семинардарга кыттан, билиитин таһымын үрдэтэр, сайыннарар санаалаах.
«Кыылы-сүөлү, көтөрү-сүүрэри иитии, бастатан туран, оҕолорбутун үлэҕэ-хамнаска сыһыаран, үлэттэн толлубат буола улааталларыгар наада. Иккиһинэн, кэлии астааҕар бэйэҥ оҥорон, астаан таһаарбыт этиҥ-аһыҥ, үүтүҥ-сүөгэйиҥ ама туохха тэҥнэһиэй?! Кэтэх хаһаайыстыбанан дьарыктаныан баҕалаахтарга, саҥа саҕалааччыларга судаарыстыба көмөтө төһүү күүс буолар уонна атахха турарга улаханнык көмөлөһөр», – диэн Светлана Юрьевна санаатын этэр.
Сиһилии «Хотугу сардаҥа» хаһыакка ааҕыҥ
Евдокия ЕГОРОВА