Өймөкөөн улууһугар сыл аҥаардааҕы көрдөрүүнэн, 19 оҕо күн сирин көрбүт. Бу туһунан эрэдээксийэҕэ Өймөкөөннөөҕү ЗАГС управлениетын салайааччыта Авдотья Кондакова иһитиннэрдэ.
Улууска 19 оҕо төрөөбүтүттэн 10 кыыс, 9 уол.
Бу кэмҥэ 12 паара ыал буолбут, оттон итиччэ ыал арахсыбыт.
Сыл саҥатыттан 7 киһи аҕа буоларын туоһулуур докумуону оҥоттордо, биэс улуус олохтооҕо аатын уларытта. Оройуоҥҥа 41 олохтон туорааһын түбэлтэтэ регистрацияланна.
Улууска бэс ыйын көрдөрүүтүнэн 4 оҕо: 2 кыыс уонна 2 уол күн сырдыгын көрдө.
Авдотья Прокопьевна иһитиннэрбитинэн, үгүс төрөппүттэр “Госуслуги” портал өҥөтүнэн туһаналлара элбээтэ. Онно кинилэр “Рождение ребенка” салааҕа киирэн, саҥа төрөөбүт оҕолорун электроннай көрүҥүнэн регистрациялыыллар.
От ыйын 8 күнүгэр бэлиэтэммит Дьиэ кэргэн, таптал уонна бэриниилээх буолуу күнүгэр ЗАГС дьиэтигэр өр кэмҥэ бииргэ олорбут кэргэнниилэри чиэстээһин үөрүүлээх быһыыга-майгыга ыытылынна.
Украинаҕа бара турар байыаннай дьайыы кыттыылааҕа Иван төрөөбүт бөһүөлэгэр сынньана кэлэ сылдьан, тапталлааҕын Юлияны кытта ыал буоллулар.
Дьоро күҥҥэ өссө улуус киинин элбэх оҕолоох дьиэ кэргэнэ Чимитдоржиевтарга “Сыл ыала-2023” бэстибээл туоһу суругун туттардылар.
Евдокия Егорова