Соторутааҕыта Өймөкөөн нэһилиэгэр көҥүл тустууга уонна хапсаҕайга өрөспүүбүлүкэтээҕи күрэхтэһии үрдүк таһымнаахтык ааста. 2007-2012 с. төрүөх уолаттар икки ардыларынааҕы турнир биир дойдулаахпыт, көҥүл тустууга успуорт маастара Анатолий Мергинев сырдык кэриэһигэр ананна.
“Өймөкөөн Тымныы Оройо” МТ дьаһалтатын кылаабынай исписэлииһэ Сардаана Степанова иһитиннэрбитинэн, күрэх чэрчитинэн спортсменнары, тириэньэрдэри, ыалдьыттары холбоон туран, улууска 100-чэкэ киһи кэлэн барда.
Икки күн устата Муома, Уус Алдан, Абый, Чурапчы, Томпо уонна Өймөкөөн улуустарын бөҕөстөрө тыҥааһыннаах тустууну көрдөрдүлэр, успуорду сэҥээрээччилэри улаханнык сэргэхситтилэр.
Өрөспүүбүлүкэтээҕи турнир кылаабынай судьуйатынан Өймөкөөн дьоно-сэргэтэ дириҥник ытыктыыр, киэн туттар, СӨ хапсаҕайга успуорт маастара, РФ көҥүл тустууга успуорт маастара, аан дойдутааҕы таһымнаах турнирдар чөмпүйүөннэрэ уонна призердара Александр Оконешников үлэлээтэ.
Андрей Стефанчук Өймөкөөн сэлиэнньэтигэр суос-соҕотох көҥүл тустуу тренера буолар. Кини бу өрөспүүбүлүкэтээҕи турнир ыалдьыттарын ыҥыран, көрсөн, күрэхтэһии үрдүк таһымнаахтык ааһарыгар тус кылаатын киллэрдэ.
Күрэхтэһии сүрүн спонсорынан “ЭСКО профит” ХЭТ (Новосибирскай, гендириэктэр А.В. Тетельман) буолла. Маны тэҥэ спонсордарынан Өймөкөөн улууһун урбаанньыттара Н.Н. Протопопов (Томтор), Р.М. Макарова (Өймөкөөн), П.Ф. Балаева (Томтор), Т.Т. Дягилев (Уус-Ньара), Томтордооҕу такси сулууспата (В.М. Беляев), А.С. Оконешников, Н.Г. Дягилева (Өймөкөөн), Ю.Л. Асонов (Владивосток) уонна А.А. Мергинев аймахтара Старковтар, Атласовтар дьиэ кэргэннэрэ буоллулар.
Турнир үөрүүлээх аһыллыытыгар “Өймөкөөн Тымныы Оройо” МТ дьаһалтатын баһылыга Павел Васильев, Анатолий Мергинев балта Лилия Старкова, чугас доҕоро Никифор Протопопов, Приморскай кыраайтан кэлбит көҥүл тустуу Федерациятын бэрэсидьиэнэ Юрий Асонов уонна Александр Оконешников эҕэрдэ тылларын тиэртилэр. Оскуола оҕолоро күндү ыалдьыттарга анаан эҕэрдэ нүөмэрдэри бэлэхтээтилэр. Тустуук уолаттар Айтал Сивцев, Айсан Громов уонна Степан Шпнев турнир аһыллыытын чиэстээн трионан ыллаабыттара улахан биһирэбили ылла.
— Олохтоох дьаһалта аатыттан тустуу күрэҕин тэрийсэн көмөлөспүт Александр Оконешниковка, тэрилтэлэргэ, олохтоохторго, спонсордарбытыгар, ыалдьыттарбытыгар улахан махталбытын тиэрдэбит, — диэн эттэ түмүккэ Сардаана Степанова. – Кыайыы өрөгөйүн билбит спортсменнары истиҥник эҕэрдэлиибит!
Сиһилии “Хотугу сардаҥа” хаһыакка ааҕыҥ.
Семен Сивцев хаартыскаҕа түһэриилэрэ
Любовь Кривошапкина