Алтынньы 20-23 күннэригэр дойдубут тэбэр сүрэҕэр – Москуба куоракка Кыайыы волонтердара норуоттар икки ардыларынааҕы пуорум ыытылынна.
Сүдү суолталаах дьаһалга Томтор орто оскуолатын выпускнига, ХИФУ устудьуона, Дьокуускайдааҕы Кыайыы волонтердарын эрэгийиэннээҕи салаатын толорооччу дириэктэрэ, Улуу Кыайыы 80 сылын норуоттар икки ардыларынааҕы волонтердарын куорпустарын тириэньэрэ Тимур Егоров кытынна.
Пуорумҥа Арассыыйаттан уонна тас дойдулартан 300-н тахса волонтер муһунна. Ол курдук 30-тан тахса тас дойдуттан кэлбит кыттааччылар киэҥ историческэй хабааннаах тэрээһиҥҥэ билиилэрин хаҥата кэлбиттэрэ олус кэрэхсэбиллээх. Кинилэр 2025 сылга бэлиэтэнэр Улуу Кыайыы 80 сыллаах үбүлүөйүн тэрээһиннэрин үрдүк таһымнаахтык ыытыыга хамаанда тэринэн, күүс-көмө буолуохтара.
Ити курдук Аҕа дойду Улуу сэриитигэр Кыайыы 80 сыллаах өрөгөйдөөх үбүлүөйүгэр үлэлиэхтээх Норуоттар икки ардыларынааҕы волонтердар куорпустарын үлэтэ саҕаланна.
— Аҕа дойду улуу сэриитигэр Кыайыы 80 сылын көрсө ытык ыалдьыттары уонна байыаннай дьайыы кыттыылаахтарын кытта көрсүһүүлэр былааннаммыттара. Иннибитигэр Аҕа дойду улуу сэриитигэр Кыайыы 80 сылын тэрээһиннэрин бэлэмнээһиҥҥэ сүҥкэн, улахан үлэ күүтэр, – диэн иһитиннэрдэ Тимур Егоров.
Евдокия ЕГОРОВА