Ыраах Тымныы Полюһа, онтон өссө Көмүстээх Өймөкөөн диэн аатырар оройуон кэнники сэттэ сылга араас биричиинэнэн баһылыктарыгар табыллыбакка, аҕыйах сыл иһигэр хас да киһи уларыйан, олохтоох дьону сүрдээҕин хомото сырытта.
Ол да буоллар, олох иннин диэки баран иһэр, дьон-сэргэ эрэлин сүтэрбэтэ. Инньэ гынан 2024 сыл балаҕан ый 9 күнүгэр улуус баһылыгын быыбара буолбутугар, көхтөөх кыттыыны ылбыттара. Олохтоохтор санааларын түмэн, биир сомоҕо буолан, Өймөкөөн улууһун Томтор нэһилиэгэр оҕо сааһа ааспыт Александр ОКОНЕШНИКОВКА куоластарын биэрэн, аҕа баһылыгынан талбыттара.
Ол кэннэ балаҕан ыйын 27 күнүгэр улуус киинигэр, Уус-Ньаараҕа, саҥа баһылык дуоһунаһыгар киирэр бэлиэ тэрээһинэ буолбутугар, Александр Савельевич оройуон иннин диэки сайдарын туһугар таһаарыылаахтык үлэлиэм диэн эрэл тылын этэн туран, аҕа баһылык быһыытынан үлэтин саҕалаабыта.
Ити кэмтэн балайда кэм ааһа оҕуста, кыһыл көмүс күһүнү кыстык үрүҥ хаар бүрүйдэ. Мин таһаарыылаахтык үлэлээн-хамнаан ааспыт Өймөкөөммүн санаан, А.И. Оконешников куоракка кэлэ сылдьарын көрсөн, кини үлэтин-хамнаһын туһунан, быстахтык да буоллар, сэһэргэһэн ыллым.
Бу кэпсэтии туһунан сиһилии «Хотугу сардаҥа» хаһыат ахсынньы 27 күнүнээҕи нүөмэригэр ааҕыҥ.
Маргарита ВИНОКУРОВА,
уопс. корр., педагогическай билим хандьыдаата, СР үөрэҕириитин үтүөлээх үлэһитэ, Өймөкөөн, Эбээн-Бытантай улуустар бочуоттаах олохтооҕо, Россия суруналыыстарын Сойууһун чилиэнэ,
Дьокуускай к.