Валентина Карпова, Өймөкөөн улууһун П.В. Заболоцкай аатынан Үчүгэй орто оскуолатын дириэктэрэ санаатын маннык үллэстэр:
— Мин өрөспүүбүлүкэ киин куоратыгар Саха сирин үөрэҕириитин үлэһиттэрин атырдьах ыйынааҕы мунньахтарыгар кыттыыны ыла сылдьабын.
Пленарнай мунньахха Ил Дархан Айсен Николаев, Ил Түмэн бэрэссэдээтэлин солбуйааччы Александр Жирков, Бырабыыталыстыба бэрэссэдээтэлин солбуйааччы Анатолий Семенов, Үөрэх уонна билим миниистирэ Ньургууна Соколова, Арассыыйа дьоруойа Игорь Юргин, өрөспүүбүлүкэбит бары улуустарыттан үөрэх управлениеларын, үөрэхтээһин тэрилтэлэрин салайааччылара, педагогтар, педагогическай уопсастыбаннас кыттыыны ыллылар.
Быйылгы атырдьах ыйынааҕы мунньах сүрүн тиэмэтэ «Воспитание личности в едином образовательном пространстве» диэн ааттаах. Ол чэрчитинэн уһуйаан – оскуола — идэтийбит үөрэх кыһалара биир сыаллаах-соруктаах үлэлииллэрин ситиһии өрөспүүбүлүкэҕэ үөрэҕирии салаатын сайыннарыы сүрүн хайысханан буолара бэлиэтэннэ.
Учууталлар сүбэ мунньахтарыгар үүнэр көлүөнэни патриоттуу быһыыга-майгыга, дьиэ кэргэнтэн саҕалаан үлэнэн иитии боппуруостара инники күөҥҥэ турдулар. Атыннык эттэххэ, мин тус бэйэм урукку, биһиги саастаах дьон иитиллэн тахсыбыт систиэмэбит сөптөөҕүн, наадалааҕын, туһалааҕын бэлиэтээн туран, ону сөргүтүү, саҥалыы тыыннаах буолар диэн ылынным.
Любовь Кривошапкина