Сыыппара көрдөрөрүнэн, оттооһуҥҥа төһө даҕаны уустук сайын аастар, улуус аграрийдара быйылгы оттооһун хампаанньатыгар 3660 тонна былааннаахтарыттан, балайда оту бэлэмнээтилэр — 2 231,2 тонна.
Ол курдук, улуустааҕы Тыа хаһаайыстыбатын управлениетын исписэлиистэрэ биэрбит чахчыларынан, балаҕан ыйын 16 күнүнээҕи туругунан Өймөкөөн улууһун үрдүнэн оттооһун былаана 68,8% туолла. Санатан эттэххэ, быйыл сайын 206 звенонан 512 киһи оттоото.
Ол иһигэр 2-с Бороҕон нэһилиэгэр 55 звеноҕа 182 киһи ходуһаларга тахсыбыта. Манна оттооһун былаана – 1230 тонна. Отчуоттуур кэмҥэ сорудах туолуута 72,9% тэҥнэстэ.
Үчүгэй нэһилиэгэр отчуттар былааннара – 370 тонна этэ, балаҕан ыйын 16 күнүнээҕи туругунан сорук туолуута 31,4 бырыһыаҥҥа тэҥнэстэ.
Өймөкөөн нэһилиэгэр тыа хаһаайыстыбатын бородууксуйатын оҥорон таһаарааччылар бары күүстэрин-уохтарын ууран туран, 1100 тонна оту булунуохтаахтарыттан 601 тн оту охсон, былааннарын 54 % толордулар. Биллэрин курдук, бу нэһилиэккэ уонна чугастааҕы учаастактарга халаан уута улаханнык тахса сырытта.
Сордоҥноохтор оттооһун былаанын 80,8 бырыһыан толордулар (былаан – 600 тн).
Төрүт нэһилиэгэр быйыл 16 биригээдэнэн 36 киһи оттоото. Манна оттооһун былаана 332 тонна этэ, былаан туолуутун бырыһыана 61,1 бырыһыан буолла.
Үөһээ ыйыллыбыт чахчылар балаҕан ыйын 16 күнүнээҕи көрдөрүүгэ олоҕурдулар.
Любовь Кривошапкина