Арассыыйаҕа Дьиэ кэргэн уонна Саха сиригэр Оҕо саас сылыгар бу дьыл тохсунньу- атырдьах ыйдарыгар улууспутугар уопсайа 27 оҕо күн сирин көрдө. Онтон кыыһа – 11, уола – 16 – диэн Өймөкөөн улууһунааҕы ЗАГС сэбиэдиссэйэ Авдотья Кондакова иһитиннэрдэ.
Тымныы полюһун төрөппүттэрэ кэлиҥҥи кэмҥэ оҕолоругар эриэккэс ааттары биэрэр идэлэннилэр. Холобур, быйыл төрөөбүт кырачаан кыргыттарга Микаэлла, Айаана, Айыллаана, Аливия диэн курдук сэдэх ааттары биэрдилэр. Оттон уолаттары сорох төрөппүттэр Долун, Дархан, Эркин, Велислав, Даниэль, Дьулуур, Николь диэн ааттаабыттар.
Аны туран Өймөкөөн улууһугар 2024 с. аҕыс ыйын иһигэр 45 киһи олохтон туораата. 12 паара саҥа ыал буоллулар. Оттон 16 ыал атырдьах салаатыныы араҕыста. Аҕыс киһи аҕа буоларын туоһулаппыт, түөрт гражданин аатын уларыппыт.
Дойду бэрэсидьиэнэ Владимир Путин көҕүлээбит “Демография” национальнай бырайыага өрөспүүбүлүкэҕэ былааннаахтык үлэлиирин туоһутунан быйыл Саха сирэ Уһук Илин уокуругар демографическай уонна дьиэ кэргэн бэлиитикэтигэр биир бастыҥынан ааттаммыта буолар. Онуоха элбэх социальнай көмө миэрэлэрэ, тиһиктээх үлэ төһүү буолбута саарбаҕа суох.
Любовь Кривошапкина