Биһиги биир дойдулаахпыт суруналыыс Дина Белолюбская 2012 с. Хотугулуу-Илиҥҥи федеральнай университет филологическай факультетыгар «Журналистика» хайысхатыгар үөрэммитэ. Онтон Дьокуускайга маркетинг уонна СМИ отделын салайар дуоһунаһыгар 2017 сылтан үлэлээбитэ. 2022 сылтан ыла «Азия оҕолоро» норуоттар икки ардыларынааҕы кэмитиэккэ информационнай сайдыы (продвижение) отделын салайааччытынан үлэлиир.
Дина бэйэтин туһунан маннык кэпсээтэ:
— Оҕо сааһым, оскуолатааҕы сылларым Томтор нэһилиэгэр ааспыттара. Анна уонна Василий Белолюбскайдар дьиэ кэргэннэригэр бастакы оҕонон күн сирин көрбүтүм. Биһиги бииргэ төрөөбүттэр үһүөбүт, икки бырааттаахпын.
2012 с. Н.М. Заболоцкай-Чысхаан аатынан Томтор оскуолатын ситиһиилээхтик үөрэнэн бүтэрбитим. 5-6 кылаастан саҕалаан суруналыыс буоларга толкуйданар этим. Оскуолаҕа үөрэнэ сылдьан нуучча тылын уонна литэрэтиирэтин уруоктарыгар умсугуйан туран үөрэммитим. Мин учууталларым Мария Поликарповна Боярова уонна Марина Семеновна Атласова этилэрэ. Кинилэр инники олохпор киэҥ аартыгы арыйбыттара. Учууталларым миэхэ дириҥ билиини биэрбиттэригэр улаханнык махтанабын.
Биллэрин курдук, быйыл ыытыллыбыт VIII-с «Азия оҕолоро» аан дойдутааҕы спортивнай оонньуулар историческай дойдуларыгар, Саха сиригэр Дьокуускайга, ыытыллыбыттара. Мин Оонньуулар пресс-кииннэригэр үлэлээбитим. Сүрүн пресс-кииҥҥэ федеральнай эрэгийиэннээҕи, уонна кыраныысса таһынааҕы иһитиннэр-көрдөрөр тиһиктэр үлэһиттэрин кытта ыкса алтыһан үлэлэспитим.
Оонньуулары ыытыы чэрчитинэн «Азия оҕолоро» диэн сурунаал күннээҕи бэбиэскэҕэ олоҕуран бэчээттэнэн тахсара. Ону тэҥэ онлайн-версиятын эмиэ оҥорбуппут. Уопсайа 12 нүөмэри оонньуу саҕаланыаҕыттан бүтүөр диэри таһаарбыппыт.
Сурунаалга араас дойдулартан кэлбит оонньуу кыттыылаахтара, олимпийскай чемпионнар, выпускниктар интервью биэрбиттэрэ. Спортсменнар сурунаал тахсыбыт маҥнайгы нүөмэриттэн саҕалаан, дойдуларыгар илдьэ барбыттара. Бу сурунаал спортивнай оонньуу бастыҥ сувенира буолла диэн этиэхпин баҕарабын.
Дина бииргэ үлэлиир кэллиэгэтин кытта
Үлэбит чэрчитинэн араас дойдулартан кэлбит волонтердартан, ыалдьыттартан уонна көрөөччүлэртэн олус үчүгэй сыанабылы ылбыппыт олус үөрүүлээх, долгутуулаах.
Бу үлэм түмүгүнэн VIII-с «Азия оҕолоро» оонньуулар Арассыыйа Олимпийскай кэмитиэтиттэн уонна Сахабыт сирин Ил Дархана Айсен Николаевтан Махтал суругу тутар чиэскэ тиксибитим.
Евдокия Егорова