Соторутааҕыта Томтордооҕу бибилэтиэкэҕэ “Оленеводы Оймяконья” диэн кинигэ сүрэхтэниитэ ыытылынна.
Кинигэ матырыйаалларын 30-тан тахса сыл улуус төрүт олохтоох аҕыйах ахсааннаах норуоттарын Ассоциациятын солбуллубат сэкирэтээринэн үлэлээбит Ашеина Елизавета Прокопьевна хас да сыл устата дьаныардаахтык ылсан хомуйбута.
Онтон тиһигин, бэчээккэ бэлэмнээһинин, үбүлээһинигэр дылы тиийэ сүүрүүтүн-көтүүтүн бибилэтиэкэ тутаах үлэһиттэрэ Надежда Литвинцева уонна Агния Сивцева оҥордулар.
Дьоһуннаах таһаарыыга эбээн норуота биир ытыктыыр, сүгүрүйэр суруйааччыта, Арассыыйа суруйааччыларын сойууһун чилиэнэ, СӨ Бочуоттаах гражданина Андрей Васильевич Кривошапкин историческай, энтографическэй матырыйаалларга олоҕуран эбээн норуота сэбиэскэй былаас олохтоно илигинэ ханнык сирдэринэн тайаан олорбутун туһунан ыстатыйата, сэбиэскэй былаас олохтонуутун саҕана Өймөкөөн улууһун эбээннэрин олохторо ыараханын бэлиэтээн туран, ону чэпчэтэргэ саҥа былаас үлэһиттэрэ үрдүкү былааска туруорсууларын туһунан РФ Суруйааччыларын сойууһун чилиэнэ, кыраайы үөрэтээччи Сергей Михайлович Егоров ыстатыйата, улуус төрүт олохтоох аҕыйах ахсааннаах норуоттарын дьыалаларын салаатын бастакы сэбиэдиссэйэ Мария Петровна Кинкалак (Голикова) СӨ национальнай архыыбыттан Аҕа дойдуну көмүскүүр сэрии 1941-1945 сылларыгар Өймөкөөн эбээннэрэ түбүктээх үлэлэрэ үрдүктүк сыаналаммытын туһунан матырыйаала о.д.а. кииирбиттэр.
Кинигэ сүрэхтэниитигэр сылдьыбыт дьон бары долгуйан туран урукку кэмнэрин санаан, аһаҕастык кэпсэтэн, санааларын сайа үллэһиннилэр. Матырыйааллары дьаныһан туран хомуйбут Елизавета Ашеинаҕа, бэчээттээн, тиһэн, үбүлээһинигэр сүүрбүт-көппүт Томтор бибилэтиэкэтин үлэһиттэригэр махтал тыл бастыҥын этэн туран, өссө да эбэн, үлэлэһэн кинигэ элбэх ахсаанынан тахсарыгар баҕа санааларын этиннилэр.
Хаартыскаларга: кинигэ сүрэхтэниитэ Үчүгэй нэһилиэгэр (Наталья Громова түһэриитэ).
Марианна Таркова, аҕыйах ахсааннаах төрүт олохтоох омуктар «Ай-Молкээн” Ассоциацияларын бэрэссэдээтэлэ, Томтор
Бу туһунан сиһилии “Хотугу сардаҥа” хаһыакка ааҕыҥ